وزیراعظم عمران خان نا 15 قومی پارک جوڑ کننگ نا ڈٹ آن ملک انا سرسوز و شاداب رقبہ ٹی ودکی مریک، چاگڑد ءِ گچین کننگ اٹ کمک، بے روزگار ورناتے روزگار نا وارخواہی دوبریک

اسلام آباد۔ 02 جولائی (اے پی پی) وزیراعظم عمران خان پنچ شنبے نادے آ 7300 مربع کلو میٹر آن زیات علاقہ غا تالان 15 قومی پارک جوڑ کننگ نا ڈٹ انا پڑو ءِ کرے۔ دا ڈٹ آن نئے بیرہ ملک انا سرسوز و شاداب رقبہ ٹی ودکی مریک و چاگڑد ءِ گچین جوڑ کننگ کن کمک رسینگک بلکن بے روزگار ورناتے روزگار نا وارخواہی ہم دوبریک۔ ’’پروٹیکٹڈایریا انیشی ایٹو‘‘ نا پن آن بناکروک آ دا ڈٹ انا رداٹ ملک انا پورٹیکٹڈ ایریا ءِ 13 درسد آن ودفسا 15 درسد اسکان کننگک و دارقبہ نا جوان بست و بند و گچین گورننس ءِ ہم پک کننگک انتئے کہ داوخت آ زیات تر پورٹیکٹڈ ایریا بیرہ کاغدآتا حداسکان محدود ءُ۔ وزیراعظم عمران خان ہراتینٹ ماحولیات نا گچینی نا بابت بھاز است خواہی تخک کوروناوائرس نا دین انا حالیت آتے ٹی ملک اٹی ماحولیات ءِ گچین کننگ و ورناتے روزگار فراوان کننگ کن دا ڈٹ انا بناءِ کرے۔ ڈٹ انا رداٹ ملک انا قطبی مشی آ، میدانی و سویل اٹی کرکی علاقہ غاتے ٹی 7 ہزار 300 مربع کلومیٹر آن زیات رقبہ غا 15 نیشنل پارک جوڑ کننگک۔ دافتیان 9 ءِ ساڑی ہی ٹی قومی پارک آتا درجہ تننگاسس وخت اس کہ 6 ایلوفتا ہم پڑو ءِ کننگاسس ولے اوفتیا کاریم کننگتو۔ داسہ دا غٹ پارک آتے اولیکو وار پورو وڑاٹ فعال کننگک و دافتا جوان بست و بند و انصرام نا نظام اس جوڑ کننگک۔ دا ڈٹ آن بنائی مرحلہ ٹی کم و ود 5 ہزار روزگار نا براہ راست وارخواہی دوبریک۔