بنجائی وزیر قومی غذائی رکھ و پٹ وپول سید فخر امام نا کشت وکشار نا صوبائی سیکرٹری تا دیوان آن تران

اسلام آباد۔ 02 جولائی (اے پی پی) بنجائی وزیر قومی غذائی رکھ وپٹ وپول سید فخر امام پارینے کہ کھدآ سبسڈی نا کمک اٹ کشارگر آتے واکدار کننگک۔، ملک اٹی کشت و کشار نا بنداو ءِ سوگو کروئی ءِ۔ کشاری پیکج نا رداٹ 37 ارب نا سبسڈی کھد آ تننگک، بنجا و صوبہ غاک امنائی اٹ سبسڈی تننگ نا وڑوڈول اس جوڑ کینہ۔ داخیال آتا درشانی ءِ او پنچ شنبے نادے آ کشت وکشار نا صوبائی محکمہ غاتا سیکرٹری تتون کشاری مالی پیکج نا بابت دیوان نا کماشی ءِ کرسا کرے۔ اوپارے کہ مچ آ ملک اٹی 8.2 ملین کشارگر ءُ۔ اوپارے کہ وزیراعظم عمران خان کشاری بشخ ءِ پوسکن کننگ خواہک، نن دا مالی پیکج ءِ شفافیت تون تننگ خوانہ۔ اوپارے کہ تدوک آ دورتیٹی دا چرجوئی ٹی شفافیت نا خیال ءِ تخنگتو۔ دیوان اٹی بنجائی وزیر بلوچستان نا سفت ءِ کرسا پارے کہ بلوچستان اٹی 15000ایکڑ آ نامیاتی کاٹن خلنگا ہراڑآن 22 من فی ایکڑ پیدوار دوئی مس۔ سید فخر امام پارے کہ آخبت نامیاتی کشت وکشار نا ءِ۔ مستی پارے کہ ننا اولیت مریس مدتی پٹ وپول و 5 بھلا فصل آتا پیداوار اٹ ودکی مرے۔ اکنامک کنسلٹنٹ ڈاکٹر تالپور بریفنگ اٹی پارے کہ پیکج نارداٹ بزغرآتے کھد آ زرتلافی تننگک، کشاری وام تیا سود انا کچ اٹی کمتی اتنگک۔ کاٹن سیڈز و پیہن آ مکھی نا چٹفنگ کن جوجک کسفوک دوائی تا ہلنگ و ہندی وڑاٹ تیار کروک ٹیکٹر آتیا سیلز خراج اٹی سبسڈی دا پیکج نا بشخ ءِ۔ دا کشاری پیکج 19 مئی آ کابینہ منظور کرے۔ کشاری پیکج اٹ بزغرآتے کھد آتا ہلنگ آ 37 ارب روپئی نا سبسڈی تننگک۔ کشاری پیکج نا رداٹ کشاری وام تیا مارک اپ اٹ کمتی کن 8.8 ارب روپئی و کاٹن سیڈز و پہین مکھی نا چٹفنگ کن جوک آتے کسفوک آ دوائی تیا سبسڈی نا رداٹ بالترتیب 6 ارب و 2.5 ارب روپئی جتا کننگانے۔ اوپارے کہ دا پیکج اٹ ہندی وڑاٹ تیار کروک ٹیکٹر آتیا سیلز خراج نا مد اٹی 2.5 ارب روپئی نا زرتلافی اوار ءِ۔ اونافذ کننگ نا وڑوڈول اکن صوبائی سیکرٹری تتون اہم باندات آیت گپ وتران کرے و پارے کہ داہیت ءِ پک کننگے کہ پیکج آن بزغرآتے جوان وڑاٹ فائدہ مرے۔