وزیراعظم نا خصوصی کمکار ڈاکٹر ظفرمرزا پمز اٹی بیت المال نا پوسکن آ سافٹ ویئر سسٹم نا بناءِ کرے، سسٹم ءِ مرحلہ وار مچ آ ملک انا ہسپتال آتسکان تالان کننگک

اسلام آباد۔ 02 جولائی (اے پی پی) وزیراعظم نا خصوصی کمکار ڈاکٹر ظفرمرزا پمز اٹی بیت المال نا پوسکن آ سافٹ ویئر سسٹم نا بناءِ کرے۔ پاکستان بیت المال و وزارت جان جوڑی نا بھلا گام انا رداٹ ناجوڑ و حقدار بندغ آتا امداد ءِ شفاف و ترند رفتار کننگ کن پوسکن آ سسٹم ءِ درستی راستی کرفنگا۔ پمز اٹی بیت المال و وزارت جان جوڑی نا اواری اٹ بناکروک آ ڈٹ انا بنائی دود آن تران کرسا خصوصی کمکار ڈاکٹر ظفرمرزاپارے کہ حکومت وعدہ نا رداٹ پدتموک تپہ غاتا فلاح کن عملی گام گیج کننگ ءِ، ہندا ریاست مدینہ نا حقی دروشم ءِ ہراڑے وسیلہ غاتا رخ ءِ ضرورت مند آتا کنڈآ کننگ انگ ءِ۔ اوپارے کہ نیزگار و ضرورت مند ناجوڑ آتا درمان کن مالی امداد نا فراوانی ءِ پوسکن آ وڑوڈول آتیا اتنگ انگ ءِ، غٹ مرحلہ غاتے شفاف کننگ کن بیت المال وزارت جان جوڑی نا شریداری اٹ پوسکن آ مینجمنٹ سسٹم ءِ درستی راستی کرفینے۔ سافٹ ویئر نا کمک اٹ ناجوڑ آتے درمان کن کمکی زر کمپیوٹرائزڈ وڑوڈول اٹ ترند تر و شفاف وڑاٹ فراوان کننگ مریک۔ اوپارے کہ بنائی مرحلہ ٹی دا سافٹ ویئر ءِ پمزاسلام آباد تون منسلک کننگانے ہرادے مرحلہ وار مچ آ ملک انا ہسپتال آتسکان تالان کننگک۔ ڈکٹر ظفرمرزا پارے کہ بیت المال غریب و پسماندہ تپہ نا خذمت و اوفتا گرج آتے پورو کننگ کن بھلا و اہم آ ادارہ ءِ۔ انفرادی مالی امداد پاکستان بیت المال نا راجی رکھ اکن اسہ بھلو اسکیم اسے ہرانارداٹ حقدار بندغ آتے زند انا مشکل آتیان کشنگ کن براہ راست امداد تننگک۔