خلیجی ملک آتے ٹی غٹ اختہ مروک آ پاکستانی تے پدی اتنگ نا آپریشن یک و نیم ہفتہ ٹی پورو کننگک، ڈاکٹر معید یوسف نا این سی او سی ٹی پریس کانفرنس

اسلام آباد۔ 02 جولائی (اے پی پی) وزیراعظم نا خصوصی کمکار قومی سلامتی ڈاکٹر معید یوسف پارینے کہ پاکستان نا فضائی دنگ داڑے اختہ مروک آ بندغ آتے پدی دننگ کن ملنگ انگانے، کوروناوائرس چٹتنے نئے مدامی پاکستانی فضائی دنگ ءِ ملنگ انگانے، پاکستان اولیکو دے آن پیشن ہنوک آ مسافر آتا سکریننگ ءِ کننگ ءِ۔ پیشن نا ملک آ ہنوک آ بندغ آک تینا کوروناٹیسٹ ءِ المی کرفیر، زرس ہم علامت مروک آ مسافر ءِ ہم سفر کننگ نا موکل تفننگک، اگہ داوڑنا مسافر اس سفر کیک تو اودے او ملک ڈی پورٹ کیک، داڑآن پاکستان نا ہم بدنامی مریک۔ جہانی میڈیا غا بھاز انگا کوویڈ۔ 19 پازیٹو ناپیشن نا ملک آتا ہِننگ نا خبر آتے ٹی ہچ ءُ راستکی اس اف۔ پاکستان زموار ءُ ملک اسے و کوویڈ۔ 19 نا بابت تینا غٹ تر زمواری تے پورو کننگ ءِ۔ او پنچ شنبے نادے آ نیشنل کمانڈ اینڈ آپریشن سینٹر (این سی او سی) ٹی میڈیا ءِ حوال تسکہ۔ خصوصی کمکار ڈاکٹر معید یوسف پارے کہ پی آئی اے پیشن نا ملک آتے ٹی اختہ مروک آ پاکستانی تے پدی اتنگ کن تینا آپریشن ءِ برجاتخانے، 90 درسد پاکستانی ہرا خلیجی ملک آتے ٹی اختہ ءُ، اوفتے پدی اتنگ انگ ءِ، یک ونیم ہفتہ اسکان غٹ اختہ مروک آ پاکستانی تے پدی اتنگ نا آپریشن ءِ پورو کننگک۔ اوپارے کہ پاکستان مہالو آن پیشن نا ملک آتیا ہنوک آتا سکریننگ ءِ کننگ ءِ ولے داسہ پیشن نا ملک و ایئر لائن نا اسی او پی تارداٹ ہموغٹ مسافر ہرا پاکستان آن پیشن نا ملک آتیان ہِننگ خوارہ اوفتے معلومدار کننگ ءِ کہ او تینا کوروناوائرس ٹیسٹ ءِ کرفراگہ زرس ہم علامت ارے تو او ایئر پورٹ آ بننگ آن پاناد کے۔ اوپارے کہ گڑاس ہندن ءُ واقعہ مون آ بسنے کہ پیشن نا ملک آتیا ہنوک آ بندغ آتے ٹی کوویڈ۔ 19 پازیٹو بسنے ولے اوفتا کچ مفننگ نا بریبر ءِ ولے گڑاس ملک و میڈیا ٹی داوڑنا پروپیگنڈا کننگاکہ پیشن نا ملک آتے ٹی پاکستان آن بروک آتے ٹی گیشتربندغ آتے ٹی کوروناپازیٹو ءِ۔ اومثال تس کہ برطانیہ ہندن ءُ ملک اسے ہراڑے بالی پٹ آ سرمننگ آ کوروناوائرس نا ٹیسٹ مفک۔ برطانیہ غا ہنوک آ بالی پٹ آ سرمننگ آن پد گاڈی ءِ ہرفک اُراغا کاہک و اُراٹی 14 دے قرنطینہ مریک، ہموڑے اڈ کننگ آن ہفت دے آن پد اگہ پازیٹو مثبت بریک تو داہم مننگ کیک کہ کوروناہموکان لگوئے۔ اوپارے کہ تدوک آ مسہ تُو اٹی کوروناوائرس ٹیسٹ، اونا خڑچ، قرنطینہ نا خڑچ آتے حکومت ہرفے۔ اوناتو اسٹ اس ہم ستاءِ کتو۔ ڈاکٹر معید یوسف پارے کہ وزارت خارجہ سفارتی کہول آ یورپین یونین نا معاملہ ءِ ہُننگ ءِ، پاکستان سنگل آؤٹ مس و نئے سنگل آؤٹ مننگ کن الینہ، کوویڈ۔ 19 آ پاکستان سنجیدگی نا درشانی ءِ کرینے۔