جہانی تنکی پاکستان و جہانی برادری ءِ ادارہ غاتے ٹی پنجرجاتی اصلاحات نا موقع اس فراوان کرینے، سینئر اکانومسٹ ورلڈ بینک

اسلام آباد۔ 02 جولائی (اے پی پی) ہر تنکی اسہ موقع اس ضرور ایتک، کوویڈ۔ 19 نا جہانی تنکی پاکستان و جہانی برادری ءِ ادارہ غاتے ٹی پنجر جاتی اصلاحات نا موقع اس فراوان کرینے۔ ورلڈ بینک انا سینئر اکانومسٹ گونزالو ویرالا پارینے کہ بروک آ تُو تیٹی شارٹ ٹرم گام گیج آتیان جہانی واپار نا گچینی ٹی داخہ کمک رسینگپک ہرانا گمان ءِ چاہندار آک کننگ ءُ۔ اوپارے کہ داحالیت آتے ٹی پاکستان کن برآمد آک بھلو اہمیت اس تخرہ ہرافتے ٹی ودکی المی ءِ۔ اوپارے کہ پاکستان نا برآمدی بشخ روزگار نا فراوانی ٹی بنداوی اہمیت تخک، ہرابھاز انگا پاکستانی تا جوان ءُ روزگار اسے نا سوب ءِ۔ اوتینا اسہ بیان اسےٹی مستی پارے کہ جہانی و علاقائی واپار اٹی گچینی و آسانی تیان پاکستان پائیدار اقتصادی شونداری نا حقی وارخواہی تیان فائدہ تون اوار اوار نیزگاری ٹی ہم کمتی اتنگ کیک۔ گونزالو ویرالا سمارٹ ایکسپورٹ پروموشن پالیسی نا رداٹ برآمد آتے ٹی ودکی آن بیدس زرگزرانی بحالی کن پنجر جاتی اصلاحات نا ہم گرج آ زور شاغا۔ اوپارے کہ حکومت ءِ مرے کہ برآمد آتا مون آ دننگ اٹ بروک آ اڑاند آتا چٹفنگ آن برآمد آتا ودکی ٹی کمک تننگ کیک۔ و جہانی مارکیٹ اٹی پاکستانی برآمد کنندگان آک گچین وڑاٹ مقابلہ نا پوزیشن اٹی بننگ کیرہ۔ اوپارے کہ دا بابت درآمد آتا بابت پابندی تیٹی ہم نرمی اتنگ نا گرج ءِ تانکہ برآمدی و کاروباری ادارہ برآمد آتے ٹی گچین وپائیدار ودکی کن درآمدی گرج آتے پورو کننگ کیر ہراڑکن پنجر جاتی اصلاحات آ چکار کننگے۔