چیئرمین سینیٹ نا مصر انا سفیر طارق داروگ تون اوڑدہی ٹی گپ وتران

اسلام آباد۔ 01 جولائی (اے پی پی) چیئرمین سینیٹ محمد صادق سنجرانی پارینے کہ گوادر دنیا نا زرگزرانی حب ءِ، مصر انا زرکارآک دازرگزرانی حب آن پبی فائدہ ہرفنگ کیرہ۔ ایوان بالا، صوبائی حکومت و تعلقدار ادارہ غاتا کمک اٹ دامسخت کن ہروڑنا آسراتی فراوان کننگ کن تیاراُن۔ داخیال آتا درشانی ءِ چیئرمین سینیٹ مصر انا سفیر طارق داروگ تون پارلیمنٹ ہاؤس اٹ اوڑدہی ٹی کرے۔ چیئرمین سینیٹ محمد صادق سنجرانی پارے کہ مصر انا زرکارآک شپنگ، لائیو اسٹاک، فشریز، معدنیات و سروسز نا فراوانی آن بیدس ایلو بشخ آتے ٹی ساڑی زرکاری نا وارخواہی تیان پبی فائدہ ہرفنگ کیرہ۔ چیئرمین سینیٹ پارے کہ مصر متکن آ دودوربیدہ، تہذیبی تمدن و علم انا وت مسنے واینو ہم دنیا کن تاریخی اہمیت تخک۔ پاکستان مصر اتون تینا ہڑتوم آ کنڈآتا تعلقداری تے بے کچ قدر انا نظر اٹ ہرک دا تعلقداری تا بنداو اسیجا دودوربیدہ، مذہبی و راجی مماثلت آتیاٹی ءُ۔ اوپارے کہ پارلیمانی سفارتکاری ءِ کاریم اٹ اتسا ڈل انا ہن و برتیٹی ترندی اتنگ و السی کہول آ رابطہ غاتا سوگوی کن گام گیج کروئی مریک۔ محمد صادق سنجرانی مصر انا سفیر ءِ انٹرنیشنل پارلیمنٹ کانگریس نا گرج و مسخت آتا بابت سرجم معلومدار کرسا سلہ خلک کہ مصر انا پارلیمنٹ نا باسک آک دا یکتاانگا جہانی پلیٹ فارم اٹ بشخ ہلیر۔ اوپارے کہ پاکستان و مصر انا نیام اٹ تعلیم نا بشخ آتے ٹی کمکاری ءِ پین مون آ دننگ نا گرج ءِ تانکہ ہڑتوم آ ملک آتا طالب علم آتے ہڑتوم آ ملک آتے ٹی تعلیم کننگ نا وارخواہی دوبننگ کےانتئے کہ طالب علم آک جوان ءُ سفیر اسے نا وڑاٹ کاریم کیرہ و داڑآن تین پہ تینی رابطہ غاک ہم سوگو مریرہ۔ چیئرمین سینیٹ داوخت آ سلہ خلک کہ مصر انا مجلس نواب نا چیئرمین پاکستان نا دورہ ءِ کے و تین تون پارلیمانی و کاروباری ڈل آتے ہم اتے تانکہ زرگزرانی و واپاری بشخ آتے ٹی ساڑی بپی کچ انا رداٹ تعلقداری تے مون آ دننگ مرے۔ صادق سنجرانی مصر انا سفیر ءِ پاکستان نا ادارہ پارلیمانی خذمت نا بابت ہم سرجم آتیان معلومدار کرسا سلہ خلک کہ مصر انا پارلیمنٹ نا باسک آک کانود جوڑ کننگ نا بابت اسہ ایلو نا آزموندہ غاتیان فائدہ ہرفنگ کیرہ و خاص کر اسلامی کانود جوڑ کننگ نا بابت کمکاری نا بھلو گنجائشت اس ارے و داٹی گچینی کن ادارہ پارلیمانی خذمت نمان کڑد ادا کننگ کیک۔ محمد صادق سنجرانی پارے کہ کورونا نا سوب آن دنیا نا حالیت آک اسُل بدل مسنو و دا دینی مرض ہراڑے مچ آ دنیا ءِ مشکل آتے ٹی اختہ کرینے ہموڑے تین پہ تینی کمکاری و اسیجا لائحہ عمل نا بابت پوسکن ءُ کسر ہم ملانے ہراڑآن جہانی برادی اسہ ایلونا پین خڑک بننگ کیرہ تانکہ دا وڑنا آفت آتا جوان وڑاٹ مقابلہ ءِ کننگ مرے ۔ مصر انا سفیر چیئرمین سینیٹ ناخیال آتیان اتفاق کرسا پارے کہ مصر پاکستان تون ہڑتوم آ کنڈآتا کمکاری ءِ پین مون آ دننگ نا است خواہی تخک و بڑزکوکہول آ ڈل آتا ہن و برآن دا تعلقداری تے پین سوگوی ملک و پاکستان اٹی زرکاری آن پبی فائدہ ہرفنگک۔