اسلام آباد۔ 01 جولائی (اے پی پی) پاکستان اٹی جہانی بینک انا کنٹری ڈائریکٹر الانگو پیچوموتو پارینے کہ 50 کروڑ ڈالر نا کمکاری آن پاکستان ءِ مالیاتی سوگوی و زرگزرانی بحالی ٹی کمک رسینگک۔ اوداہیت ءِ چارشنبے نادے آ راجی رابطہ غاتا ویب سائٹ ٹویٹر آ جاری مروک آ اسہ کلہو اسے ٹی پارے۔ اوپارے کہ پاکستان کوروناوائرس نا دین انا زرگزرانی نسخان تا سوب آن مالیاتی لوڈو تتون مون تننگ ءِ، ملک ءِ ہلہلہ ئی جان جوڑی، راجی و کاروبار نا رکھ اکن خڑچ آتے ٹی ودکی کروئی تمنگ ءِ۔ جہانی بینک انا کنٹری ڈائریکٹر پارے کہ دا کمکاری پاکستان ءِ رائز پروگرام نا رداٹ تننگ انگ ءِ ، داپروگرام نا رداٹ پاکستان نا حکومت ءِ زرگزران نا سوگوی، پدسلوک اصلاحات، و سوگو و مسابقتی زرگزران ءِ شون تننگ اٹ کمک فراوان کننگک۔ پروگرام نا رداٹ خراج نا بنداو اٹ ودکی، خراج پالیسی ٹی گچینی، ڈیبٹ مینجمنٹ و شفافیت و بجلی نا بشخ اٹی مالیاتی نا دوئی کننگ اٹ پاکستان نا حکومت نا کمک ءِ کننگک، داکان بیدس فرمز و کمپنی تے باقاعدہ جوڑ کننگ اٹ بروک آ اڑاند آتے مر کننگ، ڈیجیٹیل زرتس آتے ٹی ودکی، گچین و باضابطہ رئیل اسٹیٹ ڈویلپمنٹ و نجی زرکاری نا است بڈی ٹی ہم کمکاری نا فراوانی ءِ ممکن کننگک۔ یات سلے کہ جہانی بینک انا بورڈ آف ڈائریکٹر اسہ دے اس مست پاکستان کن 50 کروڑ ڈالر نا کمکاری نا منظوری ءِ تسوسس۔ رائز پروگرام کن انٹرنیشنل ڈویلپمنٹ ایسوسی ایشن و جہانی بینک 250، 250 ملین ڈالر فراوان کیرہ۔ انٹرنیشنل ڈویلپمنٹ ایسوسی ایشن نا وام تا وخت 30 سال ءِ ہرافتے ٹی پنچ سال انا رعایتی مد تننگانے۔ جہانی بینک انا وام تا مد 25.5 سال ءِ ہراٹی پنچ ءُ نیم سال انا رعایتی مد تننگانے۔
