اسلام آباد۔ 01 جولائی(اے پی پی) نیشنل ڈیزاسٹرمینجمنٹ اتھارٹی (این ڈی ایم اے) طبی عملہ کن رکھی گڑاتا دہ می کھیپ انا صوبہ غاتے فراوانی نا بناءِ کرے۔ این ڈی ایم اے نا ترجمان نا رداٹ بلوچستان و گلگت بلتستان ءِ دہ می کھیپ انا گڑاتے مون تننگانے۔ بلوچستان ءِ چندی وڑنا 1 لکھ 21 ہزار 986 و گلگت بلتستان ءِ 55 ہزار 950 ماسک تننگانے۔ بلوچستان ءِ 5 ہزار 811 و گلگت بلتستان ءِ 3 ہزار 385 رکھی سوٹ تننگا۔ 32 ہزار 885میڈیکل گاؤن بلوچستان ءِ و 15 ہزار 69 گلگت بلتستان ءِ تننگا۔ ترجمان پارے کہ داکان بیدس فیس شیلڈ، سرجیکل کیپ، دستانہ، پلاسٹک بوٹ، شوزکور و رکھی عینک ہم بھلو کچ اسے ٹی تننگانے۔ ایلو غٹ صوبہ غاتے ہم دہ می کھیپ انا فراوانی ءِ کننگ انگ ءِ۔ ترجمان نا رداٹ این ڈی ایم اے داتم اسکان مچ آ ملک اٹی 14 لکھ 24 ہزار 699پورو پی پی ایز سیٹ فراوان کرینے۔
