اسلام آباد۔ 01 جولائی(اے پی پی) اینخو سال 2020ء نا اولیکو سہ ماہی ٹی اسلامی بینکاری نا بشخ انا ڈیپازٹ آتے ٹی 40 ارب روپئی ودکی مسنے۔ ہنداوڑ مارچ 2020ء نا ایسر آ جم بینکاری نا قومی صنعت اٹی اسلامی بینکاری نا بشخ انا ڈیپازٹ آتا کچ 17 درسد اسکان سرمس۔ اسٹیٹ بینک آف پاکستان نا کنڈآن جنوری آن مارچ 2020ء کن جاری کروک آ اسلامی بینکاری بلیٹن نا رداٹ مارچ انا ایسر آ اسلامی بینکاری نا صنعت نا ڈیپازٹ 2.692کھرب روپئی اسکان ودانے وخت اس کہ دسمبر 2019ء نا ایسر آ ڈیپازٹ آتا کچ 2.625کھرب روپئی ئس۔ ہنداوڑ مسہ تُو اٹی شعبہ نا ڈیپازٹ آتے ٹی 40 ارب روپئی نا ودکی مس ہراٹی بینکاری نا جم قومی صنعت نا ڈیپازٹ آتے ٹی اسلامی بینکاری نا بشخ انا ڈیپازٹ 16.9 درسد اسکان ودا وخت اس کہ داڑآن تدوک آ سہ ماہی نا ایسر آ دا کچ 16.6درسد ئس۔ رپورٹ نا رداٹ جنوری آن مارچ 2020ء ٹی شعبہ نا میرات آک 76 ارب روپئی نا ودکی آن 3.360 کھرب روپئی اسکان ودار وخت اس کہ تدوک آ سہ ماہی نا ایسر آ اسلامی بینکاری نا میرات آتا مالیت 3.284 کھرب روپئی ریکارڈ کننگاسس۔ ہنداوڑ مارچ 2020ء نا ایسر آ بینکاری نا جم صنعت اٹی اسلامی بینکاری نا صنعت نا میرات آتا کچ 15.2 درسد اسکان ودا وخت اس کہ دسمبر 2019ء نا ایسر آ دا کچ 14.9 درسد ریکارڈ کننگاسس۔ رپورٹ نارداٹ دا وخت آ ملک اٹی اسلامی بینکنگ نا خذمت فراوان کروک آ ادارہ غاتا کچ 22 ءِ ہرافتیان 5 پورو اسلامی بینک وخت اس کہ 17 ایلو روایتی بینک ہم تینا اسلامی بینکنگ نا خاص انگا برانچ آتا رداٹ صارف آتے اسلامی بینکاری نا خذمت فراوان کننگ ءُ۔
