اسلام آباد۔ 30 جون (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ وزارت سائنس و ٹیکنالوجی نا تیار کروک وینٹی لیٹر آتا اولیکو کھیپ ءِ پنچ شنبے نادے آ این ڈی ایم اے نا حوالہ کننگک، بروک آ مالی سال اٹی حکومت و اپوزیشن ءِ ملک انا خاطر کم آن کم ٹک آتیا مبنی ایجنڈا غا امنائی ودی کروئی مریک۔ سے شنبے نادے آ قومی اسمبلی ٹی آغاحسن بلوچ و اسلم بھوتانی نا کنڈآن سردار اختر مینگل نا بابت بنجائی وزیر شیخ رشید احمد نا بیان نا بابت اعتراضی ٹک انا ورندی ءِ ترسا اوپارے کہ ننکن بلوچستان آن تعلق تخوک آ سیاسی سرکڑدہ غاک بے کچ شرف نا قابل ءُ۔ پوسکن آ سال بناء مننگ والا ءِ داٹی ننے غٹ تر چکار ءِ اصلاحات آتیا کروئی مریک۔ اوپارے کہ تدوک آدے اسٹاک ایکسچینج جلہو اٹی سیکورٹی کارندہ غاک تینا جان تے ندر کرسا دہشت گردی نا ڈٹ ءِ بے سہب کریر۔ نن اوفتے خراج عقیدت پیش کینہ۔ بنجائی وزیر سائنس و ٹیکنالوجی پارے کہ 26 فروری آ کورونا نا اولیکو کیس پاکستان اٹی مون آ بس ۔ ہمووخت آ پاکستان اٹی ہچ ءُ گڑاس جوڑ کننگتوکہ۔ نن غٹ گڑاتے امپورٹ کرینہ۔ پنچ مارچ آ نن وزارت سائنس و ٹیکنالوجی نا ’’میڈان پاکستان‘‘ ڈٹ آ کاریم نابناءِ کرین داسہ نن دا غٹ گڑاتے برآمد کننگ اُن۔ پاکستان اٹی نن تینا میڈان پاکستان وینٹی لیٹر جوڑ کرینن۔ اولیکو کھیپ پنچ شنبے نادے آ این ڈی ایم اے نا حوالہ کننگک۔ اوپارے کہ اگہ گڑاتے پیشن آن خواہفنہ تو نہاد آک زیات مریرہ۔ پاکستان نا تیار کروک وینٹی لیٹر آتا نہاد آک پیشن آن بروک آ وینٹی لیٹر آتا مقابلہ ٹی اسہ تتہائی اسے۔ پاکستان نا ہونہار طالب علم آک ننا اصل میرات ءُ۔ دا تپہ غا بایدے خڑچ مرے۔ ننے اومیت ءِ کہ بروک آ سال حکومت و اپوزیشن نا نیام اٹ کم آن کم ٹک آتیا امنائی ایجنڈااس ترتیب تننگے۔ نن بایدے عدالتی اصلاحات و نیب انا کانود اٹ اصلاحات اتین۔
