ہری پور۔ 30 جون (اے پی پی) بنجائی وزیر توانائی، پٹرولیم و قدرتی وسیلہ عمر ایوب خان جبری و شادی فیڈر نا بناءِ کرے۔ پوسکن آ فیڈرآن جبری، بانڈی، نلہ، ٹیال، بدھار، ستوڑا، شادی، فاروقیہ، رانی واہ، پنڈگجراں و کاملپور تون اوار ایلو چندی علاقہ غاتا واپڈا صارف آک فائدہ ہرفرہ۔ پوسکن آ چالو مروک آ جبری و شادی فیڈر کھولیاں بالا و حطار گریڈ تون گنڈوک ءُ۔ بنائی دود آن تران کرسا بنجائی وزیر توانائی عمر ایوب خان پارے کہ السی مشکل آتا دمدستی ازالہ و زند انا آب ءِ بڑز کنننگ تون اوار اوار حلقہ نا شونداری کن دے و نن خواری کننگ اُن، الس بے پناہ مہر و مریبت و کمک کرسا دا ہند آ سرکرینے۔ السی محرومی تا چٹفنگ اولیت ءِ، بجلی نا ویل آتے ایسر کرسا دا جاگہ غاتیا ہم لو وولٹیج ءِ چٹفینن، ہراڑے منہ وخت مست موبائل ہم چارج کننگ کن وولٹیج پورو متوکہ۔ بنائی دود انا وخت آ مسکوہی صوبائی وزیر و پی ٹی آئی نا راہشون یوسف ایوب خان، مسکوہی ایم پی اے نثار صفدر خان، ملک عبدالسلام و ملک سلیم عباسی تون اوار ایلو علاقہ نا سرکڑدہ غاک و مسکوہی بلدیاتی نمائندغاک و واپڈا آفیسر آک ہم اوڑتون اوار ئسر۔ عمر ایوب خان پارے کہ زوت اِرا پین فیڈر ہم تیار مریک ہراڑآن علاقہ تناول اٹی بجلی وولٹیج نا ویل آتا چٹفنگ ممکن مریک۔ سرائے نعمت خان فیڈر 10 جولائی وخت اس کہ صوابی میرا فیڈر 18 جولائی آ پورو مریک۔ دا وخت آ علاقہ جبری و شادی نا سرکڑدہ غاک بنجائی وزیر عمر ایوب خان ءِ بجلی نا ویل آتے ایسر کننگ آ زبردست لوز آتے ٹی خراج تحسین پیش کریر۔
