کوئٹہ۔ 30 جون (اے پی پی) وزیراعظم عمران خان نا ویژن نا رداٹ سرکاری ملازم و شاری تے کوئٹہ و گوادر اٹی آسان قسط آتیا ہنکین تننگ کن فیڈرل گورنمنٹ ایمپلائز ہاؤسنگ اتھارٹی و بلوچستان حکومت نا نیام اٹ مفاہمتی یات داشت آ دستخط کننگا۔ سے شنبے نادے آ سول سیکرٹریٹ کوئٹہ ٹی مروک آ دود اٹی ڈائریکٹر جنرل فیڈرل گورنمنٹ ایمپلائز ہاؤسنگ اتھارٹی وسیم حیات باجوہ و بلوچستان حکومت نا سیکرٹری اربن پلاننگ و ترقیات خلیق نذر کیانی مفاہمتی یات داشت آ دستخط کریر۔ داوخت آ چیف سیکرٹری بلوچستان کیپٹن (ر) فضیل اصغر، سیکرٹری پلاننگ و ڈویلپمنٹ عبداللہ خان نورزئی،سیکرٹری کانود ڈاکٹر اکبر حریفال تون اوار وزارت ہاؤسنگ نا عہدیدار آک ہم ساڑی ئسر۔ ڈائریکٹر جنرل فیڈرل گورنمنٹ ایمپلائز ہاؤسنگ اتھارٹی وسیم حیات باجوہ پارینے کہ ہاؤسنگ اسکیم اٹ بلوچستان نا ملازم آتا کوٹہ 60 درسد، بنجائی حکومت نا آفیسر آتا 15 درسد کوٹہ و 25 درسد کوٹہ لس شاری تیکن ہنکینی ہند، فلیٹ آتے ٹی تخنگانے۔ درملکی زرکارآک دا ڈٹ آتے ٹی زرکاری کننگ اٹ خاص است خواہی تخرہ۔ اوپارے کہ ہاؤسنگ اسکیم تا ڈاؤن پیمنٹ بیرہ 10 درسد تخنگانے و بنجائی وزیر ہاؤسنگ اینڈ ورکس طارق بشیر چیمہ نا پارت نا رداٹ 2 آن 3 سال انا تہہ ٹی صوبائی حکومت نا کمک اٹ نن گوادر و کوئٹہ ٹی ہنکینی ڈٹ ءِ پورو کینہ۔ چیف سیکرٹری بلوچستان کیپٹن (ر) فضیل اصغر بنجائی حکومت و وزارت ہاؤسنگ نا عہدیدار آتا منت واری ءِ ہرفسا پارے کہ صوبائی حکومت فیڈرل گورنمنٹ ایمپلائز ہاؤسنگ اتھارٹی تون اواری اٹ ہنکین پروجیکٹ آتا زوت پوروی کن تینا کلیدی کڑد ءِ ادا کیک تانکہ وزیراعظم عمران خان نا گائیڈ لائن ءِ مون آ تخسا دا ڈٹ آن زیات آن زیات مخلوق ءِ ہنکین کن اُرا اس تننگ مرے۔
