اسلام آباد۔ 29 جون (اے پی پی) بنجائی وزیر مواصلات مراد سعید پارینے کہ وزیراعظم عمران خان و اونا ٹیم الس نا مون آ سرسہب ءُ۔ دوشنبے نادے آ قومی اسمبلی ٹی پارلیمانی راہشون تا کنڈآن چست کروک آ ٹک آتا ورندی ٹی اوپارے کہ وزیراعظم عمران خان مدام پارینے کہ پی پی پی و مسلم لیگ نا نیام اٹ نورا کشتی چلینگک ایہن تو ہڑتوم آک اسٹ ءُ۔ اوپارے کہ کوروناوائرس نا دین انا سوب آن حکومت آ تنقید مس ، اپوزیشن نا مخلوق پیہن انگاتیان بھاز زہمی ءُ ہنداخاطرآن حوالہ تننگ اُٹ کہ اینو بلوم برگ ہم پارینے دنیاءِ پورو لاک ڈاؤن نا جاگہ غا سمارٹ لاک ڈاؤن نا کنڈآن دننگے۔ الس و دا ایوان فیصلہ کیک کہ دیر غلط ءِ دیر سہی ءِ۔ اوپارے کہ پیپلزپارٹی و مسلم لیگ (ن) نا دور بناکننگ تون پی آئی اے و اسٹیل ملز نسخان اٹی ہنار۔ اوپارے کہ دا مخلوق عمران خان نا سپاہی نا مقابلہ ءِ کننگ کپسہ۔ عمران خان تون انت مناظرہ کیرہ نن پارلیمان و ٹی وی آ مناظرہ کن تیار اُن۔ اوپارے کہ شاہد خاقان عباسی نا ہمو بیان الس ءِ معلوم ءِ کہ انتس کہ پی آئی اے ہلیک اسٹیل ملز اوڑتون ایتک۔ مراد سعید پارے کہ بجٹ آ تنقید مسنے ولے دا مخلوق است آن درے کہ عمران خان 200 ارب روپئی آن زیات نا تاریخی احساس پروگرام اس تس۔ اولیکو وار خیبر پختونخوا، آزاد کشمیر اٹی 100درسد مفت درمان، پنجاب اٹی 70 درسد مفت و گچین درمان عمران خان فراوان کرینے۔ عمران خان اقوام متحدہ ٹی ختم نبوت نا معاملہ ءِ ہرفے۔ اینو نن سرسہب اُن۔ اینو عمران خان سرسہب ءِ۔ نن الس تون مون تننگ کینہ۔ اوپارے کہ ہراتم داامریکہ غا ہنارہ تو سی آئی اے کمامدارآتے پاریرہ کہ نم ڈرون خلسا کبو نن سنبھالسا کینہ۔ وکی لیکس اٹ مچ آ سرجم آک نوشتہ ءُ۔ عمران خان پختون و پاکستان نا مقدمہ ءِ کرے۔ داہمینگ ہنسا پرچی ایسُرہ۔ اوپارے کہ بلاول بھٹو ءِ تقریر نویس ءِ بدل کے یا تو او رٹا ءِ ہلے۔ اوپارے کہ درو فاطمہ بھٹو نا بیان بسنے۔ دا پرچی نا بنداو آ سیاست کیرہ۔ فاطمہ بھٹو نا کتاب ءِ ای خوانانٹ۔ اوتینا باوہ نا خون نا مچ آ سرجم آتے نوشتہ کرینے کہ ہراتم اونا باوہ ءِ شہید کننگا، ہراوڑاو پی ایم ہاؤس آ فون کرسا کرے۔ اوپارے کہ بجٹ اٹی انصاف کارڈ و نیزگاری نا چٹفنگ کن گام گیج کننگا۔ نن جمہوریت آ باور کینہ و چنکا صوبہ غاتا شونداری ءِ خوانہ ولے پیپلزپارٹی کراچی نا ایم این اے تا شونداری کاریم تیا سٹہ ہلنگ ءِ۔ نن بلوچستان و سندھ اٹی نیزگاری نا چٹفنگ کن دہ درسد ودکی فنڈ جتا کرینن۔ عمران خان نا کماشی ٹی نن سرسہب مسونن۔ او خوددار ءُ لیڈر اسے۔ پاکستان شون ہلیک۔ ای چیلنج کیوہ چینل اسے آ دلیل ایتر۔ نم حلقہ اس گچین کبو ای ہموڑے مقابلہ کیوہ۔
