اسلام آباد۔ 29 جون (اے پی پی) بنجائی وزیر صنعت و پیداوار حماد اظہر پارینے کہ ملکی تاریخ اٹی اولیکو وار خراج فری بجٹ اس تننگانے، بجٹ اٹی الیکٹرک کارز، موبائل فون، مینوفیکچرنگ پالیسی و ماحولیاتی پالیسی نا بنداو ءِ تخنگ انگ ءِ، اپوزیشن نا اعصاب آ احتساب نا عمل سُوار ءِ۔ نن مافیا تا برخلاف برسراقتدار بسن، نن اِرا بھلو مافیا تا مقابلہ ءِ کرسا اوفتے اقتدار آن پیشن کشان، شوگر مافیا، آئی پی پیزمافیا، نُت مافیا و پی آئی اے ٹی مافیا نا مقابلہ ءِ کینہ۔ دوشنبے نادے آ قومی اسمبلی ٹی فنانس بل اٹ ترمیم نا منظوری آ شرہ ءِ چٹفسا اوپارے کہ اینو اہم ءُ دے اس ئس۔ کوروناوائرس نا دین انا ماحول اٹ اینو فنانس بل و داٹی ترمیم نا منظوری کن داڑے غٹ یکجا مسنوولے داکان پد ہم اپوزیشن داوڑنا حالیت آتے ٹی بیرہ جملہ غاتے چکنگ اٹ لگوک ءِ۔ اوپارے کہ ہراتم جہانی مارکیٹ اٹی تیل انا نہاد آک کم مسر تو ڈیہہ ٹی غٹ آن کم نہاد پاکستان اٹی ئس و حکومت تیل انا کم نہاد آتا فائدہ ءِ الس ءِ تس، داسہ جہانی مارکیٹ اٹی تیل انا نہاد آک اِرا ہنداخہ مسنو، تیل آ ہفدہ درسد سیلز خراج و 30 روپئی پٹرولیم ڈویلپمنٹ لیوی عائد کننگ نا منظوری مسلم لیگ (ن) نا دور اٹی تننگا و اینو ہم ہنداکچ ءِ۔ حماد اظہر پارے کہ شوگر پالیسی ٹی اصلاحات المی ءِ انتئے کہ دانا کرپاس و برآمد آتون اوار کیہی اہم باندات آتا تعلق ءِ۔ اگہ اوفتا دور اٹی 22 ارب روپئی سبسڈی تننگانے تو سہی نن گیرام کینہ۔ ملک ءِ مون آ دروئی ءِ تو کشت و کشار ءِ سہی کروئی مریک۔ ای بطور صنعت و پیداوار نا وزیر نا وڑاٹ دا ہیت ءِ پاننگ اُٹ کہ ملک ءِ اگہ مون آ دروئی ءِ تو ننے تینا کشت وکشار ءِ شون تروئی مریک۔ اوپارے کہ بجٹ اٹ الیکٹرک کارز و موبائل فون مینوفیکچرنگ پالیسی و ماحولیاتی پالیسی نا بنداو ءِ تخنگ انگ ءِ۔ داڑکن نن تعلقدار وزارت و ادارہ غاتا منت وار اُن ہرافک دا پالیسی ءِ جوڑ کننگ اٹ کڑد ادا کریر۔ حماد اظہر پارے کہ تاریخ اٹ اولیکو وار پاکستان اٹی خراج فری بجٹ اس بسنے، ای ہراتم بجٹ تقریر نا بناءِ کریٹ تو مہالو آن نامنظور نا نعرہ ءِ خلنگا دانا مطلب ءِ کہ اوفک بجٹ دستاویز آتا مطالعہ ءِ کتویسر۔ ملکی تاریخ اٹی اولیکو وار اسہ کروڑ 60 لکھ خاہوت آتے راجی رکھ فراوان کننگا۔ 30 لکھ کاروبار و لکھ آ صارف آتے بجلی نا مد اٹ کمک فراوان کننگا۔ صوبہ غاتون اواری اٹ این ڈی ایم اے کن 75 ارب روپئی جتا کننگا، سالانہ شونداری پروگرام اٹی پی ایس ڈی پی ٹی بلوچستان و سندھ اکن غٹ آن زیات فنڈ جتا کننگانے۔ 1600 آن زیات ٹیرف لین تیا خراج و ڈیوٹیز ءِ چٹفنگانے۔ حماد اظہر پارے کہ اپوزیشن نا اعصاب آ احتساب نا عمل سُوار ءِ۔ نن مافیا نا برخلاف برسراقتدار بسن، نن اِرابھلا مافیا تا مقابلہ ءِ کرسا اوفتے اقتدار آن پیشن کشان، شوگرمافیا، آئی پی پیز مافیا، نت مافیا و پی آئی اےٹی مافیا تا مقابلہ ءِ کینہ۔
