وزیراعظم عمران خان نا لین آف کنٹرول نا ہنکینی تیکن احساس ایمرجنسی کیش پروگرام نا بناءِ کننگ نا دود آن تران

مظفر آباد۔ 26جون (اے پی پی) وزیراعظم عمران خان پارینے کہ مقبوضہ کشمیر نا الس نا جہد آجوئی ءِ واک انا زور آ توننگ مفک، مودی نا انتہاپسند حکومت مسلمان تیا ظلم انا انتہا کرینے، آر ایس ایس ہٹلر نازی نا سوچ ءِ تینا کرینے ہرا تینٹ بھارت نا تباہی آ مبنی ءِ، 5 اگست آن مست کشمیر نا ویل ءِ مچ آ دنیا ٹی تالان کننگ کن پبی تحریک نا بناءِ کننگک، حکومت لین آف کنٹرول آ بھارتی سم کاری آن زہمی خاہوت آتا ہروڑکمک ءِ برجاتخک، احساس پروگرام نا رداٹ مالی کمکاری آن بیدس مچ آ آزاد کشمیر و انضمام مروک ضلع غاتے ٹی غٹ مخلوق ءِ جان جوڑی کارڈ ہم تننگک۔ داخیال آتا درشانی ءِ او جمعہ نادے آ داڑے لین آف کنٹرول نا ہنکینی تیکن احساس ایمرجنسی کیش پروگرام نا بناءِ کننگ نا دود آن تران کرسا کرے۔ داوخت آ وزیراعظم حقدار آتے ٹی کمکی زر انا چیک ہم بشخا۔ آزاد جموں و کشمیر نا صدر، وزیراعظم، بنجائی وزیر امور کشمیر و وزیراعظم نا خصوصی کمکار ثانیہ نشتر ئسک ہم دود اٹی ساڑی ئسر۔ وزیراعظم پارے کہ ننے لین آف کنٹرول آ مشکل حالیت آتے ٹی زند تیرکروک آ شاری تا کمک ءِ کننگ آ خوشی ءِ، احساس پروگرام نا رداٹ اسہ لکھ 38 ہزار خاہوت آتے امداد تننگک وخت اس کہ آزاد کشمیر اٹی 12 لکھ خاہوت ءِ جان جوڑی انصاف کارڈ فراوان کننگک و ہنداوڑ مچ آ آزاد کشمیر اٹی کم و ود غٹ مخلوق ءِ دا آسراتی دوبریک ہرانا کمک اٹ 10 لکھ روپئی اسکان درمان کرفنگ مریک۔ وزیراعظم پارے کہ جان جوڑی انصاف کارڈز اوار مروک آ ضلع غاتا غٹ بندغ آتے تننگک۔ اوپارے کہ کچ اٹنگا وسیلہ غاتیان پد ہم آزاد جموں و کشمیر، اوار مروک ضلع، بلوچستان و گلگت بلتستان کن شونداری بجٹ اٹ ودکی کرینن، داڑآن پرخ تمپک کہ ہراڑے ہرا جماعت نا حکومت ءِ، ننکن اخس کہ مننگ کرے نن کمک کینہ۔ وزیراعظم دا وخت آ مقبوضہ کشمیر نا الس تون یکجہتی نا درشانی ءِ کرسا پارے کہ پاکستان کشمیری الس نا پورو مخ تفی ءِ برجاتخک۔ اوپارے کہ بھارت نا انتہاپسند حکومت مقبوضہ کشمیر اٹی ظلم انا انتہاکرینے، ورنامارتے زندان تیٹی بند کننگ انگ ءِ وخت اس کہ پیلٹ گن آتا کاریم اٹ اتنگ ہم برجاءِ، کشمیری تیا 8 لکھ فوج مسلط کرینے، مودی حکومت ڈٹ بندی نا رداٹ ظلم ءِ برجاتخانے۔ اوپارے کہ بھارت اٹی ہم مسلمان ظلم انا شست مننگ ءُ، آر ایس ایس ہلٹر نا نازی سوچ انا پیروکار ءِ و ہندو بالادستی نا نظریہ تون مسلمان تیان بیدس عیسائی، سکھ و ایلو اقلیت آتے ہم ارٹ میکو درجہ نا شاری جوڑ کننگ انگ ءِ۔ وزیراعظم پارے کہ دا سوچ تینٹ بھارت نا تباہی آ مبنی ءِ و دابارواٹی بھارت نا باشعور مخلوق ہم فکر مند ءِ۔ اوپارے کہ مقبوضہ کشمیر نا الس نا تحریک آجوئی ءِطاقت نا زور آ توننگ مفک، کشمیر نا تاریخ داہیت انا گواہ ءِ۔ وزیراعظم پارے کہ ای کشمیری تا وکیل مرسا مچ آ دنیا ٹی اوفتا مقدمہ ءِ پیش کریٹ وخت اس کہ دنیا ءِ ہندوستان آ کوزہ گر خطرناک سوچ انا بارواٹی ہم آگاہی تسٹ۔ اوپارے کہ بدبختی اٹ داڑے آزاد مارچ نا پن آ ننا دا تحریک ءِ لتاڑنگ نا کوشست کننگا، نن کشمیر نا ویل ءِ جہانی کہول آ پبی وڑاٹ تالان کننگ نا فیصلہ کرین، دا چرجوئی ٹی 5 اگست آن مست اندرون و بیرون ملک پبی تیاری کننگک۔