بنجائی وزیر ڈٹ بندی، شونداری ، اصلاحات اسد عمر نا بنجائی وزیر حوالکاری سینیٹر شبلی فراز تون اوار نیشنل کمانڈ اینڈ آپریشن سینٹر اٹی پریس کانفرنس

اسلام آباد۔ 26 جون (اے پی پی) بنجائی وزیر ڈٹ بندی، شونداری، اصلاحات اسد عمر پارینے کہ حکومت نا گچین گام گیج و الس نا کنڈآن رکھی گام گیج آتیا عملدرآمد نا گچین بھرم بننگ ءِ، داسکان خطرہ چٹتنے اگہ رکھی گام گیج و احتیاطی تدابیر آتیا عمل کننگتو تو حالیت آک خراب مننگ کیرہ۔ 30 جون اسکان کوروناوائرس نا کیس آتا 2 لکھ 25 ہزار نا لگ بھگ مننگ نا گمان ءِ۔ داخیال آتا درشانی ءِ او جمعہ نادے آ این سی او سی ٹی بنجائی وزیر حوالکاری سینیٹر شبلی فرازتون اوار پریس کانفرنس کرسا کرے۔ بنجائی وزیر ڈٹ بندی اسد عمر پارے کہ چاہندار آتا سلاہ نا رداٹ جون اسکان کوروناوائرس کیس آتا کچ 3 لکھ اسکان سرمننگ نا گمان ظاہر کننگاسس ولے کوروناوائرس کیس آتا ساڑی حالیت آتارداٹ 30 جون اسکان کوروناوائرس کیس آتا کچ 2 لکھ 25 ہزار نا لگ بھگ مننگ نا گمان ءِ۔ اوپارے کہ دا حساب وکتاب نا جاچ آن دا پاش مریک کہ اگہ نن سہی کاریم کینہ تو حالیت آک قابو ٹی مریرہ۔ بنجائی وزیر پارے کہ قوم احساس زمواری نا درشانی ءِ کرے وخت اس کہ حکومت ایس او پی تا خلاف ورزی تیا کارروائی کرے۔ اوپارے کہ نیشنل کمانڈ اینڈ آُپریشن سینٹر آن کوروناغان بچنگ کن راہشون اصول جاری کننگا ہراٹی پرہجوم و السی ہند آتیا ماسک بیننگ ءِ المی گوندنگا۔ این سی او سی 4 جون آ صوبہ غاتے راجی فاصلہ و ماسک بیننگ نا خلاف ورزی آ انتظامی کارروائی کننگ ناپارت کرے۔ غٹ صوبہ غاک دا پارت آتیا عمل کریر۔ اوپارے کہ صوبہ غاتیان ہفتہ ٹی 3 وار حساب وکتاب آن این سی او سی ءِ معلومدار کننگک وخت اس کہ ایلو ادارہ غاتیان معلومداری فراوان کننگک۔ داحساب وکتاب آن پاش مریک کہ بھاز زیات خلقت رکھی گام گیج آتیا عملدرآمد کننگءُ۔ اوپارے کہ وسط مئی آن مچ آ ملک اٹی لاک ڈاؤن نا چرجوئی برجائس۔ 14 جون آ این سی او سی 20 بھلا شار تیٹی ہاٹ سپاٹ نا پیدواری ءِ کرے۔ اوپارے کہ کوروناوائرس کیس آتے ٹی ودکی ءِ ہرسا مخلوق فیس ماسک بیننگ، وار وار آ دوتے سلنگ تون اوار ایلو رکھی گام گیج آتیا عمل کریر ہراڑآن حالیت آتے ٹی گڑاس گچینی بس۔ اسد عمر پارے کہ داسہ خطرہ چٹتنے، اگہ نن احتیاط کینہ تو حالیت آتے ٹی گچینی بریک ولے احتیاط کپنہ تو خطرہ ودک۔ اواسہ ہفتہ ٹی کوروناوائرس نا حالیت آتے مون آ تخسا آخبت نا حکمت عملی آن معلومدار کیک۔ اوپارے کہ نن ڈاکٹر آتا پارت آتیا عمل کین۔ وار وار دوتے سلن۔ اگہ دا پارت آتیا عمل کینہ تو جان جوڑی نا نظام ژند مفک۔ کوروناوائرس نا دین انا برخلاف جنگ تننگ آ قوم و ہیلتھ ورکرز آتا منت واری ءِ ہرفیوہ و ہیلتھ ورکرآتے سلام پیش کیوہ۔