زالبول آتے زرگزرانی و راجی بشخ آتے ٹی نرینہ غاتا بریبر وارخواہی و آسراتی فراوان کننگ آن ملک انا زرگزرانی نظام ءِ سوگو و محکم کننگ مریک، گورنر بلوچستان امان اللہ خان یاسین زئی

کوئٹہ۔ 26 جون (اے پی پی) گورنر بلوچستان امان اللہ خان یاسین زئی پارینے کہ زالبول آتے زرگزرانی و راجی بشخ آتے ٹی نرینہ غاتا بریبر وارخواہی و آسراتی فراوان کننگ آن ملک انا زرگزرانی نظام ءِ سوگو و محکم کننگ مریک انتئے کہ زرگزرانی وڑاٹ وتواجہ و سوگو زالبول آتا کڑد زرگزرانی شونداری آن بیدس تینا چناتا پوسکن آ تعلیم و تربیت کن ہم بے کچ اہم مریک۔ گورنر یاسین زئی پارے کہ ساڑی حکومت زرگزرانی نظام نا گچینی و قومی پیداوار اٹی ودکی کن زند انا غٹ سرجزآتے ٹی زالبول آتا بشخ ہلنگ و اواری آ باورکیک۔ داخیال آتا درشانی ءِ او جمعہ نادے آ گورنر ہاؤس کوئٹہ ٹی ویمن چیمبر آف کامرس اینڈ انڈسٹری کوئٹہ ناسروک سونیا بلوچ نا کماشی ٹی زالبول آتا ڈل اتون گپ وتران کرسا کرے۔ داوخت آ گورنر بلوچستان پارے کہ بلوچستان نا زالبول آتے ٹی لائخی تا ہچ ءُ کمتی اس اف۔ البتہ وارخواہی تا عدم دستیابی و آسراتی نا ساڑی مفننگ اونا کسر اٹ سردست بھلو اڑاند اسے۔ گورنر یاسین زئی ڈل آ زور شاغا کہ او صنعت وواپار تون وابستہ زالبول آتا کچ اتون اوار اوار اوفتا کاریم نا کچ ءِ ودفنگ آ ہم تینا پبی چکار ءِ کے تانکہ پوسکن آ چاہنداری تے ہیل تننگ آن نیزگار و نیامئی تپہ نا زالبول آک تینا کٹیا تیٹی ودکی نا پوسکن ءُ کسر متعین کننگ کیر۔ اوڑدہی ٹی سونیا بلوچ گورنر بلوچستان ءِ صوبہ ٹی واپار کسب زالبول آتا ویل و مشکل آتیان معلومدار کرے۔ گورنر یاسین زئی اوفتا ویل و مشکل آتے غور و چکار اٹ بِنگ و اوفتا پائیدار ایسری کن تینا ہروڑنا کمکاری نا باوری کرفے۔