اسلام آباد۔ 25 جون (اے پی پی) بنجائی پارلیمانی سیکرٹری ملیکہ بخاری پارینے کہ پاکستان نا الس دوجماعتی نظام ءِ مسترد کرسا تحریک انصاف ءِ گچین کرے۔ اپوزیشن نا کنڈآن بجٹ آ ہچ ءُ تعمیراتی سلاہ اس تننگتنے، السی نمائندہ غاک الس نا پیسہ غاتا ضامن ءُ، اوفتا بایدے احتساب مرے۔ پنچ شنبے نادے آ قومی اسمبلی ٹی بروک آ مالی سال نا بجٹ آشرہ ٹی بشخ ہلسا اوپارے کہ پاکستان نا الس دوپارٹی سسٹم ءِ مسترد کرسا پی ٹی آئی ءِ گچین کرے۔ السی نمائندہ غاک الس نا پیسہ غاتا ضامن ءُ خائن آخا۔ اوفتا احتساب المی ءِ۔ عمران خان ءِ سپریم کورٹ صادق و امین گوندا۔ عمران خان ءِ اونا وژن نا سوب آن اودے حکومت نا سروک گچین کننگا۔ اوپارے کہ بلاول بھٹو بیرہ میراتی سیاست نا سوب آن سیاست کننگ ءِ۔ ننا اولیت ملک انا پدسلوک و نیزگاری ٹی اختہ مروک آ تپہ ءِ۔ ملیکہ بخاری پارے کہ پاکستان نا سالمیت غٹ آن اہم ءِ۔ ہژدہ می ترمیم اٹی ہچ ءُ جوان ءُ گڑاس اف ولے این ایف سی ایوارڈ نا بابت آمرانہ رویہ اختیار کننگا۔ بنجانا زمواریک ودانو۔ اوپارے کہ ہژدہ می ترمیم آ نظرثانی نا گرج ءِ۔ احساس پروگرام نا پنجا درسد بجٹ زالبول کن جتا ءِ۔ ملیکہ بخاری پارے کہ وزیراعظم عمران خان نا سوب آن نیزگار و نزور الس کن نمان بجٹ اس تخنگا۔ اپوزیشن آن بیدس مچ آ دنیا نا کنڈآن احساس پروگرام ناستاءِ کننگ انگ ءِ۔ اوپارے کہ ہژدہ می ترمیم نا اہمیتءِ منینہ۔ دا بنداوی حق آتے ودفے۔ ایوارڈ ءِ تدوک آ سال آن کم کپننگ نا بابت ترمیم کننگا۔ بنجانا زمواریک ودانو، آمرانہ رویہ تخپس، ہیت وگپ کیر۔
