اسلام آباد۔ 23 جون (اے پی پی) پارلیمانی سیکرٹری وجیہہ اکرم پارینے کہ ملک و قوم ءِ مون تروک چیلنج آتون مون تننگ کن یکجا مرسا مون آ بننگ المی ءِ، مشکل حالیت آتے ٹی حکومت متوازن بجٹ اس تسنے۔ سے شنبے نادے آ قومی اسمبلی ٹی بروک آ مالی سال نا بجٹ آ شرہ ٹی بشخ ہلسا پارلیمانی سیکرٹری وجیہہ اکرم پارے کہ جوان و متوازن بجٹ آاو حفیظ شیخ و حماد اظہر ءِ مبارکباد پیش کیک۔ ننے وزیراعظم نا کماشی آ پت کرسا مون آ ہنوئی ءِ۔ ہرامخلوق دین انا برخلاف جنگ تننگ ءُ اوفتے مبارکباد پیش کیوہ۔ اوپارے کہ دین انا برخلاف ہراڑے جان جوڑی نا کارندہ غاک کارینو کرینو ہموڑے محکمہ تعلیم نا ملازم و استادآک ہم اہم ءُ کڑد اس ادا کرینو۔ بنجائی وزارت تعلیم و کسبی تربیت نا کوروناوائرس تون مون تننگ کن گام گیج آک سفت نا قابل ءُ۔ اوپارے کہ وزارت فاصلاتی تعلیم نا بابت جامع گام گیج کرینے۔ قومک چیلنج آتون مون ترسا مون آ کارہ۔ اوپارے کہ مون تروک چیلنج آتون مون تننگ کن یکجا مرسا مون آ ہنوئی ءِ۔ مودی نا فاشٹ حکومت نا برخلاف ننا سیوت اہم ءِ۔ مظلوم و کشمیری ورناتاخنک ننے آ خلوک ءُ۔ اوغانستان اٹی بھارت نا کڑد انا چٹفنگ آ وزارت خارجہ، ننا سیکورٹی ادارہ غاک و حکومت سفت نا حقدار ءُ۔ بھارت پاکستان ءِ تنیا کننگ خواہسکہ ولے داسہ او چین و نیپال آن بوز اٹ کُننگ ءِ۔ ٹھپ آتیا مالم تخنگ، ویل آتا ایسری و مخلوق ءِ ریاست تون گنڈوک تخنگ، سیاسی مخلوق نا زمواری ءِ۔ نن قوم ءِ انگیج کرسا مون آ کان۔ اوشکر گڑھ اٹ سڑک، سیوریج، پاسپورٹ، نادرا نا دفتر و ٹرانسپورٹ نا ویل و نارروال آن شکر گڑھ اسکان ریلوائی نا بحالی نا خواست کرے۔
