اسلام آباد۔ 23 جون (اے پی پی) چیئرمین سینیٹ محمد صادق سنجرانی کورونا نا دین آن اٹلی ٹی مروک آ جانی نسخان آ است ہسونی نا درشانی ءِ کرسا پارے کہ دا دین انا حالیت اٹ دنیا ءِ بھلا چیلنج آتا مون تروک ءِ۔ اٹلی ٹی مروک آ جانی نسخان آ دلی افسوز مس۔ پاکستانی پارلیمنٹ و الس نا کنڈآن دلی ہڑزخواہی کیوہ، پاکستان دا دین انا مون ءِ توننگ کن اٹلی تون ہروڑنا کمکاری نا است خواہی ءِ، ہڑتوم آ ملک آتے ٹی کورونا نا سوب آن مون تروک مشکل آتا مون ءِ توننگ کن تین پہ تینی کمکاری ءِ مون آ دننگ المی ءِ، ایوان بالا ٹی پاکستان اٹلی سنگتی پڑک ءِ پین فعال کننگک۔ داخیال آتا درشانی ءِ او اٹلی نا سفیر اندریز فراریز تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو کننگ آ امنا کننگا۔ اوڑدہی ٹی چیئرمین سینیٹ پارے کہ کوروناوائرس نا حالیت اٹ دنیا ءِ بھلا چیلنج آتا مون تروک ءِ۔ اٹلی ٹی کورونا نا دین آن مروک آ جانی نسخان آ است ہسونی مس۔ پارلیمنٹ و الس نا کنڈآن دلی ہڑزخواہی ءِ امنا کیر۔ اوپارے کہ اٹلی ٹی مروک آ جانی نسخان آ است ہسونی کن ای اٹلی نا سفارتخانہ غا بننگ خواہسوٹہ۔ پاکستان دا دین انا مون ءِ توننگ کن اٹلی تون ہروڑنا کمکاری نا خواہش مند ءِ۔ اوپارے کہ ہڑتوم آ ملک آتے ٹی دین انا سوب آن مون تروک مشکل آتا مون ءِ توننگ کن تین پہ تینی کمکاری ءِ مون آ دننگ المی ءِ۔ ہڑتوم آ ملک آتا نیام اٹ زرگزرانی کمکاری ءِ ودفنگ کن پارلیمانی سفارتکاری آن فائدہ ہرفنگ مریک۔ صادق سنجرانی پارے کہ ایوان بالا ٹی پاکستان اٹلی سنگتی پڑک ءِ پین فعال کننگک۔ ہڑتوم آ ملک آتا نیام اٹ واپاری کمکاری ءِ ودفنگ کن ڈل آتا ہن و بر المی ءِ۔ حالیت آتا گچین مننگ آ اطالوی پارلیمنٹ باسک و کاروباری بندغ آتے پاکستان نا دورہ ءِ کننگ نا سلہ ءِ خلیوہ۔ گوادر اٹی زرکاری نا بھلو وارخواہی اس ارے، اطالوی زرکارآک گوادر نا دورہ ءِ کرسا زرکاری نا وارخواہی تیان فائدہ ہرفر۔ ایوان بالا واپاری بشخ آتون کمکاری ءِ گچین کننگ کن ہم اطالوی زرکارآتا ہروڑنا کمک ءِ کیک۔ اوپارے کہ ہڑتوم آ ملک آتا ایوان صنعت و واپار، واپاری کچ ءِ ودفنگ کن موقع نا جاچ ءِ ہلیر۔ اوڑدہی ٹی اٹلی نا سفیر پارے کہ صادق سنجرانی نا سلاہ پاکستان تون تعلقداری تے بے کچ اہمیت ایتنہ، زرگزرانی و سیاسی رابطہ غاتے ودفنگ کن کوشست آتے ترند کننگک۔ اوپارے کہ دین تتون مون تننگ کن جہانی برادری اسیجا لائحہ عمل اس اختیار کے۔
