
اسلام آباد۔ 23 جون (اے پی پی) وزیراعظم نا خصوصی کمکار سیاسی امور ڈاکٹر شہباز گل پنجاب نا وزیر خزانہ ہاشم جوان بخت نا پنجاب نا بجٹ نا بابت ٹویٹر آ جاری ویڈیو نا ستاءِ کرسا پارینے کہ مشکل حالیت آتے ٹی پنجاب حکومت گچین ءُ بجٹ اس تس، بجٹ اٹ عام وڑاٹ مشکل اقتصادی اصطلاحات آتا کاریم اٹ بننگ نا سوب آن لس بندغ دادے پہہ مفک۔ پنجاب نا کنزیومر بجٹ بک و صوبائی وزیر خزانہ نا دا ویڈیو الس ءِ بجٹ ءِ پہہ مننگ اٹ کمک ایتک۔ سے شنبے نادے آ تینا ٹویٹ اٹی اوپارے کہ صوبائی وزیر خزانہ نا کنڈآن السی اوار مننگ آ خواری نا دا گام گیج ستاکڑزک۔ و او دا گام گیج آ صوبائی وزیر خزانہ و اونا ٹیم ءِ مبارکباد پیش کیک۔ ڈاکٹر شہباز گل پارے کہ مسلم لیگ(ن) نا عباداللہ خان نا دروغ آ مبنی بیان کہ وزیراعظم نا تنخواہ اِرالکھ آن ہشت لکھ کننگاءِ اسہ چینل ہیڈ لین اس جوڑ کرسا چلیفے ہرا سراسر دروغ ءِ۔ اوپارے کہ وزیراعظم تو تینا آفس نا خڑچہ ءِ اسہ ارب چِل کروڑ آن کم کرسا شست ءُ ہشت کروڑ روپئی کرینے۔ اونا ہچ ءُ کیمپ آفس اس اف و اُرانا غٹ بل آتے او تینٹ ایتک۔