اسلام آباد۔ 22جون (اے پی پی) بنجائی وزیر مملکت موسمیاتی بدلی زرتاج گل وزیر پارینے کہ 42 ملین روپئی نا گرانٹ آن تینا حلقہ گچین کاری این اے 191 ڈیرہ غازی خان نا 14 اسکول آتے ٹی کلاس روم و پوسکن آ بلاک آتا تفنگ نا ڈٹ آتیا کاریم نا بناءِ کرینن۔ مستین اٹی سردار وڈیرہ و جاگیر دارآک الس آ تعلیم نا درگہ غاتے بند تخار ہراڑآن تعلیمی پسماندگی ٹی ودکی مس، پاکستان تحریک انصاف نا حکومت دامحرومی تا ازالہ ءِ کیک۔ داخیال آتا درشانی ءِ او ڈیرہ غازی خان اٹی حلقہ این اے 191 ٹی چندی پرائمری و ہائی اسکول آتا دورہ ءِ کننگ نا وخت آ کرے۔ زرتاج گل اسکول آتے ٹی عدم دستیاب آسراتی تا جاچ ءِ ہلسا پارے کہ ڈیرہ غازی خان اٹی اسکول آتا حالیت زر ابتر ءِمارو مسن تیکن کلاس روم تسکان آخا مستین اٹی اگہ کاریم کننگاکہ تو داخہ در تنزلی متوکہ۔ اوپارے کہ بدبختی اٹ 72 سال آن اسکول و تعلیمی آب اٹ گچینی اتنگ آ کاریم متنے۔ اوپارے کہ نن تینا وعدہ غاتے پورو کننگ اُن ہراعلاقہ غاتے ٹی اول سرآن اسکول اف ہموڑے پوسکن ءُ اسکول جوڑ کننگ اُن ہرافتا منظوری مسنے ، اوفتیا 42 ملین روپئی خڑچ بریک و فنڈ جاری کرینن۔ اومستی پارے کہ ہرااسکول آتا حالیت مخدوش ئس اوفتے ہم آسراتی تیان شپ کننگک انتئے کہ نن تعلیمی محرومی تیکن عملی گام گیج کننگ اُن۔ زرتاج گل نا پاننگ ئس کہ پسماندگی ءِ تعلیم نا مون آ دننگ آن چٹفنگ مریک انتئے کہ تعلیم آن مخلوق نا زند اٹ خودبخود بدلی بننگ بناکیک۔ اوپارے کہ تحریک انصاف نا حکومت تینا گچین کاری وعدہ غاتے پورو کرسا تعمیر و شونداری تون تعلیم نا بشخ اٹی ہم عملی گام گیج آتا بناءِ کرینے ہراعلاقہ و یونین کونسل آتے ٹی اول سرآن اسکول الوکہ ہموڑے داسہ پوسکن ءُ اسکول جوڑ کننگ اُن و متکن آ غٹ اسکول آتے پوسکن آ آسراتی سرکننگک، پوسکن ءُ کلاس روم و طالب علم آتے کن بلاک تفنگک۔
