بلوچستان کابینہ ءَ آیوکیں مالی سال ءِ دیمروئی ءُبے دیمروئی بجٹ 2020-21ءُ سالانہ دیمروئی پروگرام ءِ منظوری داتگ

کوئٹہ۔ 20جون ( اے پی پی ) بلوچستان ءِ سروزیر جام کمال خان ءِ سروکی ءَ صوبائی کابینہ ءِ دیوان بوتگ، کہ آئی ءِ تہءَ آیوکیں مالی سال ءِ دیمروئی ءُ بے دیمروئی بجٹ 2020-21ءُ سالانہ دیمروئی پروگرام ءِ منظوری دیئگ بوتگ۔ ایڈیشنل چیف سیکریٹری منصوبہ بندی ءُ دیمروئی عبدالرحمان بزدار ءَ کابینہ ءَ را ہمے سالانہ دیمروئی پروگرام ءِ سرءَ شونست داتگ ، ایشی ءَ آبید حزانگ ءِ سیکریٹری نورالحق بلوچءَ کابینہ ءَ را بجٹ حرچ ءُ درچ ، مالی رھبندانی ہوالگءَ شونست داتگ۔ کابینہ ءِ نیمگءَ چہ جوانیں بجٹ ءِ جوڑ کنگ ءِ سرءَ پی اینڈ ڈی ءُ حزانگ ءِ محکمہ ءِ کارءُ کرد ساڑاہگ بوتگ اَنت۔ کابینہ دیوان ءَ کورونا وائرسءَ چہ بیران بوتگیں مردمانی ھاترءَ فاتحہ وانگ بوتگ ءُ گوں آیانی حانداناں ہمدردی ءِ درشانی کنگ بوتگ۔ بلوچستان ءِ سروزیر جام کمال خان ءِ صوبائی کابینہ ءِ دیوان ءَ گوں درشانی کنان ءَ گشتگ کہ کابینہ ءِ باسکانی ہمراہ داری ءُ مے سرءَ باور کنگ ءِ شکر ءُ منت ءَ گراں کہ بجٹ ءِ جوڑ کنگءَ آیاں مے گوما ہمراہ داری ءُ مارا سرءُ سوج کتگ، ما یک اُلس دوستیں بجٹ ءَ را اسمبلی ءَ پیش کنگءَ اَنت، اُمیت اِںت کہ اپوزیشن ہم مارا منظوری ءَ ہمراہ داری کنت۔ آئی ءَ گشتگ کہ آیوکیں مالی سال ءِ بندات ءَ دیمروئی فنڈ ءِ بندات کنگ بیت بجٹ ءِ سے ماہی چارءُ تپاسءِ وڑءُ پیم ءُ رھبند دیما آرگ بنت۔ بجٹ ءِ تہءَ صوبہ ءِ رسیتگیں زر آنی تہءَ گیشی کنگ اولی دلگوشی اِنت، وتی آسراتی دیمروئی دیئگ بنت ءُ وت واجہ جوڑ بوہگ بیت۔