مزن وزیر عمران خان ءِ سروکی ءَ صدارت پاکستان انٹرنیشنل ائیر لائنز ءِ تہ ءَ گہتری ءِ ھوالگ ءَ مزن تکی دیوان

اسلام آباد۔ (اے پی پی) مزن ویر عمران خان ءِ سروکی ءَ صدارت پاکستان انٹرنیشنل ائیر لائنز ءِ تہ ءَ گہتری ءِ ھوالگ ءَ مزن تکی دیوان ءِ برجم دارگ بوت ۔ مزن وزیر کارگس ءِ نیمگ ءَ جاڑی بوتگیں ھال آنی رد ءَ اے دیوان ءِ تہ ءَ مشیر برائے بالی کار غلام سرور، وزیر ءِ اھوالکاری سینیٹر شبلی فراز، وزیر ءِ منصوبگ بندی اسد عمر، وزیر برائے پرائیویٹائزیشن میاں محمد سومرو، مشیر برائے ادارگ آںی گہتری ڈاکٹر عشرت حسین، مشیر تجارت عبدالرزاق دائود، مشیر ھزانگ ڈاکٹر عبدالحفیظ شیخ، ھاسیں کمکار برائے اھوالکاری لیفینٹ جنرل (ر) عاصم سلیم باجوہ، ھاسیں کمکار برائے اوورسیز پاکستانی سید ذوالفقار عباس بخاری، چئیرمین سرمایہ کاری بورڈ عاطف بخاری، سی ای او پی آئی اے ائیر مارشل ارشد ملک ءُ ایندگر اپسرگ شریک اتنت۔ راجی ائیر لائنز ءَ را تاوان ءَ چہ رکھینگ ءُ ایشرا ساپ ءُ تچکیں ادارگ ءِ جوڑ کنگ ءِ واستہ کتگیں گامگیج آنی سر ءَ چار ءُ تپاسی دیوان ءِ برجم دارگ بوت۔ دیوان ءَ را گوشگ بوت کہ پی آئی اے ءِ استیں زمانگ ءِ ساھت ءَ ادارگ ءِ تاوان آنی تہ ءَ باز کمی بوھگ ءُ آپریشنل تک ءَ ادارگ ابید چہ تاوان چست کنگ ءَ بالیگ آنی چلائینگ ءِ پوزیشن ءَ اتکگ پدا ھم کورونا ءِ جاور ھال آنی رد ءَ اے کوشست آماچ بوھگ ءَ انت۔ مزن وزیر عمران خان ءَ دیوان ءَ گوں گشتانک دیان ءَ گوشت کہ ارزشتی ایں راجی ادارگ ءَ را تاوان ءَ چہ رکھینگ ءُ ایشرا برجائیں ادارگ ءِ جوڑ کنگ استیں حکموت ءِ ایجڈا آںی یک بھر ات۔ آئی ءَ گوشت کہ سرکاری ادارگ آناں اربانی کلدار ءِ تاوان بار گڈی ءَ الس ءَ را اوپار کشی ءُ شگگی انت۔ ھمے ھاترا گہتری کار آناں گیش ترند کنگ ءِ ضلورت انت۔ مزن وزیر ءَ گوشت کہ پی آئی اے ءِ وڑیں راجی ادارگ ءَ را برجا ءُ سیت مندیں ادارگ ءِ جوڑ کنگ ءِ واستہ ضلورتی انت کہ انتظامی گہتری کار گیش ترند کنگ ءِ گوما توامیں استیں آسراتی آناں ساپ ءُ سلہ ایں کار رپک ءَ گوں جوانی ءَ دل یکیمی کنگ بہ بنت۔ مزن وزیر ءَ پنت ءُ شون کت کہ اے رد ءَ جوانیں ءُ ٹوھیں گامگیج آنی رد ءَ بنداتی دیمروئی کنگ بہ بیت۔