اسلام آباد ۔ 18 جون (اے پی پی) مزن وزیر عمران خان ءَ گوشت کہ سرجمیں ملک ءِ وانگ ءُ زانگ ءِ نظام ءِ تہ ءَ سیر ءُ گریب آنی تہ ءَ پرک ءِ ھلاسی حکومت ءِ اولی ترجی داتگیں کار آنی تہ ءَ ھوار انت، یکیں نمونگ ءِ وانگ ءُ زانگ ءِ رد ءُ بند دیگ ءُ سرجمیں ملک ءِ ایشی ءِ پد ءُ رند کنگ ءِ کوشست گیش ترند کنگ بہ بنت۔ مدرسہ آناں بنجاھ ءِ گوما ھمگام کنگ ھاسیں رنگ ءَ مدرسہ آنی تہ ءَ وانوکیں زھگ آناں نوکیں دور ءِ زانشت ءِ دیگ ءُ ایشاناں گیش بلدکار کنگ ءِ ھوالگ ءَ مدرسہ آنی گوما منوگر کتگیں گامگیج آنی ھوالگ ءَ ھم کوشست گیش ترند کنگ بہ بیت، کورونا ءِ جاور ھال آنی رد ءَ توامیں صوبائی وزیر زانشت ءِ شور ءُ مشور ءَ گوں زانشتی ءُ ھیل کاری کار آنی رد ءَ آیوکیں باندات ءِ گامگیج آنی بابت ئَ یکجائی گامگیج پکوئی رنگ ءَ سہرا کنگ بہ بنت۔ ایشی ءَ ھوار زانشتی ادارگ آناں مالی مشکل ءُ مات ءُ پت یا سروک آناں فیس ءِ ھوالگ ءَ استیں جیڈھ آناں گیوار کنگ ءِ واستہ گامگیج سہرا کنگ بہ بیت۔ مزن وزیر ءِ پنت ءُ شون کت کہ زانشت ءِ نظام ءِ تہ ءَ گہتری آنی رچ ءُ کورونا ءِ جیڈھ آنی ھوالگ ءَ زانشت ءِ دیمروئی ءُ حکومتی ایجنڈا آنی گیش کنگ ءِ ھوالگ ءَ برجم داشتگیں دیوان ءِ ساھت ءَ ساھت ءَ کت انت۔ دیوان ءِ تہ ءَ بنجاھی وزیر برائے زانشت شفقت محمود، بنجاھی وزیر اھوالکاری ءُ شنگ کاری سینیٹر شبلی فراز ، ھاسیں کمکار برائے اھوالکاری لیفٹیننٹ جنرل (ر) عاصم سلیم باجوہ، صوبائی وزیر پنجاپ برائے ہائر ایجوکیشن راجہ یاسر ہمایوں، چئیرمین ہائر ایجوکیشن کمیشن طارق بنوری ءُ کلانہ ایں اپسرگ شریک اتنت۔ مزن وزیر ءَ ملک ءَ یک رنگیں وانگ ءُ زانت ءِ سہرا کنگ، مدرسہ آنی ھوالگ ءَ گہتری، بلدکاریں پاکستان ءِ دیمروئی ءُ ہائر ایجوکیشن ءِ شوبگ آنی تہ ءَ گہتری ءِ ھوالگ ءَ انوگ ءَ تاں بوتگیں دیمروئی کار آنی سر ءَ بریفنگ دیگ بوت۔ جتا جتائیں صوب آنی استیں بنجاھی یونیورسٹی آنی جھلی کیمپس آنی جیڈھ آنی سر ءَ تران کنان ءَ مزن وزیر ءَ پنت ءُ شون کت کہ اے ھوالگ ءَ پکوئیں گامگیج رد ءُ بند کنگ بہ بیت تانکہ آھوداس زانشت ءِ بالاد ءَ را یک شل ءَ دارگ بہ بیت آھودا اے گپ ءَ را دل یکیمی کنگ بہ بیت کہ جھلی کیمپس آنی تہ ءَ استیں نودربر آنی زانشت اچ رنگ ءَ اوشت ءُ مھتلی ءِ آماچ مہ بیت۔ مزن وزیر ءَ گوشت کہ ورنا آناں نوکیں زانشت ءِ آسراتی دیان ءَ استیں ءُ آیوکیں باندات ءِ جیڈھ آں گوں گر ءُ چیل بوھگ ءِ واستہ تیار کنگ وھد ءِ المی ءُ ارزشتی ایں ضلورت ءُ مئے اولی کار انت۔ آئی ءَ گوشت کہ کورونا ءِ جاور ھال آنی سبب ءَ زانشت ءِ شوبگ ءَ را نہ وشیں جیڈھ آنی دیم پہ دیمی انت پداس ھم ایشی ءَ ابید ھمک رنگیں کوشست کنگ بہ بیت تانکہ زانشتی پڑ اچ رنگ ءَ آماچ مہ بیت۔ مزن وزیر ءَ پنت ءُ شون کت کہ وانگ ءُ زانگ ءِ شوبگ ءَ استیں چیلنجز آں گوں گر ءُ چیل بوھگ ءِ واستہ آئوٹ آف باکس سلوشن شور ءُ مشور کنگ بہ بیت تانکہ استیں چیلنجز آنہ مقابلہ ءَ کنان ءَ جوانیں وانگ ءُ زانگ ءِ دیمروئی ءُ آسانی ءَ گوں رسگ ءِ مشن ءَ را دیم ءَ جنزینگ بہ بیت۔
