اسلام آباد۔ 18 جون (اے پی پی) وزیراعظم نا سلاہکار ماحولیاتی بدلی ملک امین اسلم پارینے کہ شمسی توانائی آن چلینگوک آ گاڈی و موٹرسائیکل بروک آ سال جون اٹی مارکیٹ اٹی بریک، خیبر پختونخواٹی بلین ٹری ڈٹ پاکستان نا تاریخ نا ساف انگا ڈٹ ءِ، پاکستان اٹی مستین اٹی شوگر تون اوار ایلو مافیا تیا ہچ کس ءِ دوشاغنگ نا ہمت الوکہ، نن پاکستان ءِ مافیا تیان بچفنگ خوانہ، بجٹ اٹی کوروناوائرس نا دین اتون مون تننگ و کشت وکشار کن خصوصی فنڈ تخنگانے۔ پنچ شنبے نادے آ قومی اسمبلی نا دیوان اٹی بروک آ مالی سال 2020-21 ء نا بجٹ آ شرہ ٹی بشخ ہلسا وزیراعظم نا سلاہکار ملک امین اسلم پارے کہ دا بجٹ بروک آ مالی سال اکن جوڑ کننگانے۔ بجٹ اٹی کوروناوائرس کون آ دین اتون مون تننگ نا فنڈہم جتا کننگانے۔ نن اسہ کشاری ءُ ملک اسے اُن ہنداخاطرآن بجٹ اٹ کشت وکشار و فوڈ سیکورٹی کن خاص اہمیت تننگانے۔ اوپارے کہ ہرافتاداحکومت آن مست ہچ کس سجفتو ہمو نیزگار آتے کن عمران خان لنگرخانہ ملا۔ نن پاکستان ءِ مافیاتیان بچفنگ خوانہ۔ اینو اسکان ہچ کس اٹی ہمت متوکہ او شوگر تون اوار ایلو مافیاتیا دوشاغر۔ اوپارے کہ کے پی کے ٹی بلین ٹری ڈٹ پاکستان نا تاریخ نا شفاف ڈٹءِ۔ پاکستان دنیا نا موسمیاتی بدلی نا زہمی انگا ملک آتے ٹی اوارءِ۔ نن دا زہمی آ ملک آتے ٹی پنچ میکو نمبر آبرینہ۔ اوپارے کہ پی ایس ڈی پی ٹی 22 ارب روپئی جتا کننگا ولے دافتے مسہ سال اٹی 14 ارب روپئی ٹی پورو کرسا بچت کننگا۔ دا ڈٹ انا تھرڈ پارٹی آڈٹ ءِ کرفنگاہرانا جہانی ادارہ غاک ستاءِ کریر۔ ملک امین اسلم پارے کہ بروک آ مالی سال نا بجٹ اٹی سولر آ چلینگوک آ موٹرسائیکل و گاڈٛی تا ڈٹ اکن بھلو زراس جتا کننگانے۔ دا ڈٹ آ کاریم برجاءِو اومیت ءِ سولر آ چلینگوک آ موٹرسائیکل و گاڈیک بروک آ سال جون اسکان مارکیٹ اٹی بریرہ۔ ملک امین اسلم پارے کہ 84 ہزار مخلوق ءِ روزگار تننگانے دا مخلوق درخت خلنگ ءُ۔ نرسری تیٹی کاریم کننگ ءُضلع اٹک اٹی لوکل نوکری تا کوٹہ ءِ تخنگتو۔ ہندی مخلوق نا کوٹہ ءِ جتا کننگے۔
