اسلام آباد۔ 18جون (اے پی پی) بنجائی وزیر امور وگلگت بلتستان علی امین خان گنڈاپور ایل او سی آ بھارتی جارحیت نا ترندی اٹ مذمت ءِ کرسا پارینے کہ بھارتی فوج انا جارحیت نرزور کشمیری الس نا عزم ءِ سرفنگ کپک، غٹ تر حالیت آتے ٹی تینا مقبوضہ کشمیر نا ایڑھ و ایلم تا حق خودارادیت نا مخ تفی ءِ برجاتخنہ۔ پنچ شنبے نادے آ داڑے جاری بیان اٹی علی امین گنڈاپور پارے کہ کشمیری الس نا قربانیک اسُل زیان مفسہ، بھارت ءِ مقبوضہ کشمیر نا الس ءِ اوفتا حق خودارادیت تروئی مریک، کشمیری الس تدوک آ ہفتاد سال آن زبردست عزم و سگ انا درشانی ءِ کرینو، ایل او سی آ رہینگوک آ الس پاکستان نا اولیکو دفاعی لین نا کڑد ءِ ادا کننگ ءُ، ایل او سی آ رہینگوک آ الس نا جان و مال انا رکھ اکن ارب آ روپئی مالیت ناایل او سی پیکج اسے نا بناءِ کرینے۔ علی امین گنڈاپور پارے کہ ایل او سی آ رہینگوک آ الس ءِ رکھی بنکرو گچین شاہراہ تا آسراتی دوبریک۔ ڈٹ انا پوروی آن ایل او سی آ بھارتی جارحیت آن نسخان تے کم کننگ اٹ پبی کمک ملک۔ علی امین گنڈاپور پارے کہ ملک انا رکھ آ سلوک پاک فوج انا آفیسر و ورناتے سلام پیش کینہ۔ پاک فوج کوروناوائرس کون آ چیلنج نا مون ءِ توننگ کن ہم سول انتظامیہ نا پبی کمک ءِ کننگ ءِ۔ مشکل حالیت آتے ٹی مچ آقوم ءِ سیوت و سخا نا درشانی ءِ کروئی ءِ۔
