اسلام آباد۔ 18 جون (اے پی پی) بھارتی ناظم الامور گورواہلو وآلہ ءِ دفترخارجہ غا بٹنگسا 17 جون آ کوزہ گر بھارتی فوج انا کنڈآن لین آف کنٹرول (ایل او سی) نا باگسر و نکیال سیکٹر اٹی جنگ بندی نا خارتس خلاف ورزی تیا برانز ریکارڈ کننگا۔ بھارتی فوج انا خارتس سم کاری ٹی زالبول اسے تون اوار چار بے گناہ شاری شہید مسر وخت اس کہ 61 سال اناشاری اس بھاز ٹھپی مس۔ پنچ شنبے نادے آ ترجمان دفترخارجہ نا رداٹ ڈائریکٹر جنرل (سویلی ایشیاوسارک) زاہد حفیظ چودھری بھارتی ناظم الامور ءِ دفترخارجہ غا بٹنگسا برانزی چھٹی ءِ اونادوٹی تس وپارے کہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی ناظم الامور ءِ پاننگاکہ شاری آبادی تے شست کننگ است ہسونی، انسانی عظمت و شرف، جہانی انسانی حق و جہانی انسانی کانود آتیان چپ ءِ۔ بھارت نا کنڈآن جنگ بندی نا داخلاف ورزی تیان علاقائی امن و سلامتی ءِ بھاز خطرہ مون تروک ءِ ہرانا نتیجہ سٹریٹجک غلطی نا حالیت اٹ پیش تمنگ کیک۔ بھارت اینخو نا سال اٹی 1410 وار خارتس جنگ بندی نا خلاف ورزی کرے ہرافتے ٹی 12 بے گناہ شاری شہید و102 ٹھپی مسنو۔ بھارتی ناظم الامور ءِ معلومدار کننگاکہ ایل او سی آ بے چیٹی ٹی ودکی آن بھارت مقبوضہ کشمیر اٹی انسانی حق انا خلاف ورزی و بیدادی آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او اِراہزار مسٹ نا جنگ بندی معاہدہ نا پاسداری ءِ کے۔ جنگ بندی نا خلاف ورزی تا دا واقعہ غاتا جاست وپاست ءِ کرفے۔ بھارتی فوج ءِ جنگ بندی نا شرف نا پرمان ایتے۔ ایل او سی و ورکنگ باؤنڈری آ اونا رداٹ امن ءِ برقرار تخے واقوام متحدہ ناسلامتی کونسل نا قراردادآتارداٹ بھارت اقوام متحدہ نا فوجی مبصرین(یواین ایم او جی آئی پی) ءِ تینا کڑد ءِ ادا کننگ نا موکل ایتے۔
