اسلام آباد۔ 18 جون (اے پی پی) وزیر خارجہ مخدوم شاہ محمود قریشی پارینے کہ پاکستان، روس اتون تینا تعلقداری تے بھاز قدر انا نظر اٹ ہرک، نن روس اتون ہڑتوم آ کنڈآتا تعلقداری تے کثیر الجہتی و پین سوگو کننگ خوانہ۔ پاکستان اوغان امن عمل اٹ خیرخواہی نا کڑد ءِ ادا کرسا کیک۔ بھارتی کوزہ گر فوج انا کنڈآن مقبوضہ جموں و کشمیر اٹی برجا ظلم و بربریت گڑتی نا سوب ءِ ۔ داہیت آتے او روس انا تینا ہم منصب سرگئی لاروف تون ٹیل فون آ گپ وتران کرسا پارے۔ ترجمان دفترخارجہ نا رداٹ وزیر خارجہ شاہ محمود قریشی پنچ شنبے نادے آ روس انا تینا ہم منصب سرگئی لاروف تون ٹیل فون آ رابطہ کرے۔ ہڑتوم آ وزیرخارجہ غاتا نیام اٹ کوروناوائرس نا دین انا حالیت، ہڑتوم آ کنڈآتا تعلقداری و ایلو تین پہ تینی است خواہی نا باندات آتیا گپ وتران مس۔ وزیر خارجہ کوروناوائرس نا دین انا سوب آن روس اٹی مروک آ جانی نسخان آ، تینا ہم منصب تون ہڑزخواہی کرسا دا دین اتون مون تننگ کن جہانی کہول آ سوگو و اسیجا کوشست آتے کاریم اٹ اتنگ نا گرج آ زور شاغا۔ شاہ محمود قریشی پارے کہ پاکتسان، روس اتون تینا تعلقداری تے بے کچ قدر انا نظر اٹ ہرک و نن روس اتون ہڑتوم آ کنڈآتا تعلقداری تے کثیر الجہتی و پین سوگو کننگ نا خواہندار اُن۔ وزیر خارجہ کورونادین اتون مون تننگ، پدتموک ملک آتا زرگزران تے سیبو تننگ کن، وزیراعظم عمران خان نا کنڈآن‘‘ڈیٹ ریلیف نا فراوانی نا سلاہ نا بابت روسی وزیر خارجہ ءِ معلومدارکرے۔ ہڑتوم آ وزیر خارجہ غاتا نیام اٹ اوغانستان نا حالیت و اوغان امن عمل اٹ، داوخت اسکان مروک آ پیش رفت نا بابت ہم گپ وتران مس۔ شاہ محمود قریشی پارے کہ پاکستان، اوغان امن عمل اٹ خیر خواہی نا کڑد، اسیجا زمواری نا رداٹ خلوص نیت اتون اداکرسا بننگ ءِ کرساکیک۔ کشمیر نا بابت اوپارے کہ بھارتی کوزہ گر فوج انا کنڈآن مقبوضہ جموں و کشمیر اٹی برجاظلم و بربریت گڑتی نا سوب ءِ ۔ کوروناوائرس نا دین انا سوب آن مقبوضہ کشمیر نا 80لکھ شاری، دوہرے لاک ڈاؤن نا مصیبت ءِ سگنگ ءُ۔ شاہ محمود قریشی پارے کہ بھارتی کوزہ گرفوج، فرضی آپریشن تا کمک اٹ، کشمیری ورناتا ماورائے عدالت کشت وخون ءِ کننگ ءِ۔ تینا ہی ملک اٹی رہینگوک آ اقلیت آتون بھارت نا رویہ تضحیک آمیز ءِ۔ بھارت سرکارنا کنڈآن بھارتی مسلمان تے کوروناوائرس نا دین انا زموار گوندنگ مذمت نا قابل ءِ۔ جہانی برادری ہندوستان نا دا منفی رویہ نا دمدستی نوٹسءِ ہلے۔ ہڑتوم آ وزیرخارجہ غاک کثیر الجہتی، ہڑتوم آکنڈآتا تعلقداری تا مون آ دننگ کن تین پہ تینی رابطہ غاتا چرجوئی ءِ برجاتخنگ آ امنا کریر۔
