کچ اٹنگا مالیاتی گنجائشت اٹی واپار و کاروبار نا مون آ دننگ و مشکل حالیت آتے ٹی کٹیا تیٹی ودکی ننا اہم اولیت ءِ، بروک آ مالی سال اٹی پوائنٹ آف سیل نظام نا رداٹ 15 ہزار کاروبارتے سسٹم اٹ اتنگ نا ہدف ءِ، ایف بی آر ناخراج کٹیا تیٹی جم وڑاٹ 17 درسد نا ودکی مسنے، چیئرپرسن(ایف بی آر) ڈاکٹر نوشین جاوید امجد

اسلام آباد۔ 17 جون (اے پی پی) فیڈرل بورڈ آف ریونیو (ایف بی آر) نا چیئرپرسن ڈاکٹر نوشین جاوید امجد پارینے کہ کچ اٹنگا مالیاتی گنجائشت اٹ واپار و کاروبار نا مون آ دننگ و مشکل حالیت آتے ٹی کٹیا تیٹی ودکی ننا اہم الیت ءِ، بروک آ مالی سال اٹی پوائنٹ آف سیل نظام نا رداٹ 15 ہزار کاروبار تے سسٹم اٹ اتنگ نا ہدف ءِ۔ انسٹی ٹیوٹ آف چارٹرڈاکاؤنٹنٹس آف پاکستان (آئی سی اے پی) نا کنڈآن پوسٹ بجٹ کانفرنس آن تران کرسا اوپارے کہ داوخت آ نن بھلو حالیت اسے تون مون تننگ اُن، پوسکن آ بنجائی بجٹ مشکل حالیت آتے ٹی ترتیب تننگانے، ملکی تاریخ اٹی اولیکو وار بجٹ اٹ ہچ ءُ پوسکن ءُ خراج اس خلنگتنے، اوپارے کہ دین انا حالیت آتا سوب آن کاروباری حالیت آک سہی افس۔ کچ اٹنگا مالیاتی گنجائشت اٹ مرسا ایف بی آر واپار و کاروبار ءِ مون آ دننگ خواہک و دارداٹ بجٹ اٹ کیہی گام گیج کننگانے۔ اوپارے کہ جاری مالی سال اٹی ایف بی آر جوان ءُ کارکڑد اس نشان تس، ایف بی آر نا خراج کٹیا تیٹی جم وڑاٹ 17 درسد نا ودکی مس، انکم خراج وصولی تیٹی 18 درسد، سیلز خراج اٹی 15 درسد و فیڈرل ایکسائز ڈیوٹی تا وصولی ٹی 21 درسد نا ودکی ریکارڈ کننگانے۔ حکومت نا درآمد آتا حوصلہ شکنی نا سوب آن ایف بی آر نا ریونیو ٹی پرخ تمانے۔ اوپارے کہ ڈومیسٹک خراج آتے ٹی تدوک آ اسہ دہائی اٹ اولیکو وار 25 درسد نا نمان ودکی مون آ بسنے۔ اوپارے کہ مالی سال 2019-20ء ٹی ایف بی آر زرگزران ءِ دستاویزی جوڑ کننگ آ چکار کرینے۔ ننا اہم ہدف مشکل حالیت آتے ٹی ریونیو ٹی ودکی ءِ، وائرس تون اوار اوار پاکستان نا آئی ایم ایف تون پروگرام ہم چلینگ انگ ءِ۔ اوپارے کہ ایف بی آر تینا نظام و وڑوڈول ءِ گچین کننگ ءِ، ادارہ ٹی آٹومیشن آ چکار کننگ انگ ءِ، پوسکن آ بنجائی بجٹ اٹ کاروباری خڑچ اٹ آسراتی نا فراوانی کن گام گیج کننگانے، کانودی چارہ جوئی و تصفیہ جات نا گیگ بدل ایسر نا رداٹ سلاہ پیش کننگانے، داکان بیدس ایف بی آر آڈٹ سسٹم اٹ گچینی اتنگ ءِ، سیلز خراج و انکم خراج ریٹرن نا انسانی نیام تمنگ آن بیدس ادائیگی کن گچین ءُ نظام اس جوڑ کننگانے، دانظام نا رداٹ ڈیوٹی ڈرابیک نا مد اٹ 20 ارب روپئی نا ادائیگی کننگا، ہرامخلوق آئی بی اے این فراوان کرینے اوفتا اکاؤنٹ آتے ٹی 5 ارب روپئی گدریفنگانے۔ اوپارے کہ ایف بی آر نا پوائنٹ آف سیل نظام آ عملدرآمد ہم برجاءِ۔