اسلام آباد۔ 17 جون (اے پی پی) وزیر خارجہ مخدوم شاہ محمود قریشی پارینے کہ جھیڑہ ئی سیمی علاقہ غاتا بابت چین نا موقف اصولی ءِ، بھارت چین فوجی جھیڑہ غٹ بھارت سرکارنا ہندوتواسوچ انا کروک ءِ۔ اگہ ہندوستان سمجھک کہ پاکستان، اونا جارحانہ رویہ غان خلیک تو دا اونا غلط گمانی ءِ۔ چارشنبے نادے آ تینا اسہ بیان اسے ٹی وزیرخارجہ مخدوم شاہ محمود قریشی پارے کہ منہ دے آن چین و بھارت نا نیام اٹ چک و تاڑ ودسا مون آ بسکہ۔ چین وس اسکان کوشست کرے کہ معاملہ جوانی اٹ، ہیت وگپ انا کمک اٹ ایسرمرے ولے بھارت چین نا ہیت ءِ گوجالسا جھیڑہ ئی آ علاقہ ٹی ماڑی تفنگ نا چرجوئی ءِ برجاتخا۔ اوپارے کہ بھارت نا ضد آ سلنگ نا سوب آن 9 مئی آ اسہ خرینی اس مس ولے داسہ دا خونی جھیڑہ ٹی بدل مسنے، اینو ہر احوال آک مون آ بننگ ءُ اوفتا رداٹ 20 آن زیات بھارتی فوجی و آفیسر آتا مرک مسنے دا اسہ بھلو واقعہ اسے، کیہی دہائی تیان پد خونی جھیڑہ نا دا حالیت نظر بننگ ءِ، دا غٹ بھارت سرکارنا ہندوتواسوچ انا کروک ءِ۔ وزیر خارجہ پارے کہ بھارت ہراتم ہندوتوا سوچ و ضد آ سلنگ نا درشانی ءِ کیک تو حالیت آک خراب مریرہ، 5 اگست آ بھارت ہرا اسہ کنڈی گام گیج ءِ ہرفے اودے پاکستان ہم مسترد کرینے و چین ہم داڑآ معترض ءِ۔ اوپارے کہ ہندوستان، معقولیت نا جاگہ غا جنونیت نا سوچ آ ہِننگ ءِ ہرا رویہ ءِ اوفک، تینا ملک اٹی تینا اقلیت آتون کرینو، اوغٹ انا مون آٹے۔ شاہ محمود قریشی پارے کہ پاکستان امن پسند ءُ ملک اسے نن ڈیہہ ٹی امن و سوگوی نا خواہندار اُن۔ اوغانستان اٹی امن کن پاکستان نا کوشست آک مچ آ دنیا نا مون آٹو۔ اوپارے کہ اگہ ہندوستان سمجھک کہ پاکستان، اونا جارحانہ رویہ غان خلیک تو دااونا غلط گمانی ءِ، نن بھارت تون مذاکرات نا کمک اٹ معاملہ غاتے ایسر کننگ نا سلہ خلکن ہرادے او پدپشت تخا۔ وزیر خارجہ پارے کہ نم خنارے کہ فروری ٹی ہراتم ہندوستان جارحیت نا درشانی ءِ کرے تو پاکستان ہم پبی ورندی تس۔ چین نا موقف اصولی ءِ تبت ولداخ نا 3500 کلومیٹر نا علاقہ بھارت و چین نا جھیڑہ ئی آ سیمی علاقہ ءِ و اگہ بھارت دا سمجھک کہ او اودے کیدک تو شاید دا چین اکن قابل قبول مف۔
