ہڑتوم آ کنڈآتا تعلقداری، ڈیہہ ٹی امن ناحالیت، تین پہ تینی است خواہی نا باندات آتیا گپ وتران
اسلام آباد۔ 16جون (اے پی پی) اسپیکر قومی اسمبلی اسد قیصر تون پاکستان اٹی تعینات اوغانستان نا سفیر شکراللہ عاطف مشال اوڑدہی کرے۔ ہراٹی ہڑتوم آ کنڈآتا تعلقداری، ڈیہہ ٹی امن نا حالیت و تین پہ تینی است خواہی نا ایلو باندات آتیا گپ وتران کننگا۔ ترجمان قومی اسمبلی نارداٹ اسپیکر اوغان سفیر تون ہیت کرسا پارے کہ پاکستان و اوغانستان نا نیام اٹ تعلقداری مذہب، اخوت، دودوربیدہ و ہمسائیگی نا سوگو بنداوتیا استوار ءِ۔ سیم انا ہڑتوم آ کنڈانا الس نا نیام اٹ مہر ومریبت و تین پہ تینی شرف نا رشتہ ءِ ، اسپیکر قومی اسمبلی پارے کہ پاکستان اسہ پرامن ، سوگو و شونہالی اوغانستان اس ہُننگ نا خواہندار ءِ۔ پرامن، سوگو و شونہالی اوغانستان ڈیہہ نا امن و سلامتی کن المی ءِ۔ پاکستان ڈیہہ و جہانی پارٹنرزآتون اواری اٹ اوغانستان اٹی پائیدار امن نا قیام کن کوشست کننگ ءِ۔ پارلیمانی سفارتکاری نا کمک اٹ پاکستان و اوغانستان نا نیام اٹ تین پہ تینی تعلقداری تے مون آ دننگ اٹ کمک رسینگک۔ ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم کڑد ادا کننگ کیرہ۔ پاک اوغان واپار نا سوب ہڑتوم آ ملک آتے فائدہ دوئی مریک۔ اسپیکر قومی اسمبلی پارے کہ پاکستان تدوک آ چار دہائی 37 لکھ آن زیات اوغان باہوٹ آتا مہمانداری نا خذمت ءِ سرانجام تننگ ءِ۔ پاکستان اوغانستان تون زرگزرانی، اقتصادی و علاقائی شونداری کن کمکاری ءِ پین مون آ دننگ خوانہ۔ پاکستان ڈیہہ ٹی امن نا قیام تون اوار ڈیہہ نا شونداری و شونہالی کن اواری اٹ کاریم کننگ خواہک۔ داوخت آ ہڑتوم آ پارلیمان تا واپار و صنعت نا قائمہ کمیٹی تا نیام اٹ رابطہ غاتے قائم کننگ آ امنا کننگا۔ طبی مسخت آتے کن اوغان شاری تے ویزا نا جاری کننگ نا آسراتی فراوان کننگانے۔ اوغان شاریک دا آسراتی آن فائدہ ہرفنگ کیرہ۔ اوغان سفیر پارے کہ اوغانستان پاکستان تون تینا خڑکی دوستانہ تعلقداری تے بھاز اہمیت ایتک۔ پاکستان اوغان باہوٹ آتا ہراوڑاٹ مہمانداری ءِ کرینے او ستاکڑزک۔ اوغانستان ڈیہہ ٹی امن کن پاکستان نا کوشست آتے قدر انا نظر اٹ ہرک۔ اوغانستان پاکستان تون اقتصادی و واپاری بشخ آتے ٹی کمکاری ءِ مون آ دننگ نا خواہندار ءِ۔ اوغانی الس پاکستانی الس تون مہر و مریبت و خیرخواہی نا جوزہ تخک۔ اوغان سفیر پاکستان اٹی کوروناوائرس نا دین آن نہادی جان تا نسخان آ ڈکھ، است ہسونی و پدسلوک خاہوت آتون ہڑزخواہی کرینے۔ کوروناوائرس نا جہانی دین مچ آ دنیا ءِ تینا پلویڑ اٹی ہلکونے۔ اوغان الس کورونا دین انا مرض اٹی اختہ پاکستانی ایلم تا زوت دراخہ جوڑی کن دعاکرینے۔ ہڑتوم آ ملک آتا نیام اٹ واپار نا گچین وارخواہی میسر ءِ ہرافتیان فائدہ ہرفنگ انگ ءِ۔ ہڑتوم آ ملک آتا نیام اٹ تعلقداری تے پین سوگو کننگ اٹ پارلیمانی سفارتکاری اہم ءُ کڑد اس ادا کننگ کیک۔
