اسلام آباد۔ 16 جون (اے پی پی) وزیر خارجہ مخدوم شاہ محمود قریشی پارینے کہ پاکستان ڈیہہ ٹی امن وسوگوی نا خواہندار ءِ، بھارت تینا انتہاپسند پالیسی تے اٹ مچ آ ڈیہہ نا امن ءِ گہیو تخنگ ءِ، جہانی برادری دابھارتی رویہ نا نوٹس ءِ ہلے۔ او سے شنبے نادے آ وزارت خارجہ ٹی قومی سلامتی نا بابت بڑزکوکہولی دیوان نا کماشی ءِ کریکہ۔ دیوان اٹی وزیراعظم نا خصوصی کمکار قومی سلامتی ڈاکٹر معید یوسف، سیکرٹری خارجہ سہیل محمود و بڑزکو عسکری کمامدارآک دیوان اٹی ساڑی ئسر۔ دیوان اٹی قومی سلامتی، علاقائی سوگوی و ڈیہہ نا حالیت آتا بابت سرجم سلابت کننگا۔ وزیر خارجہ پارے کہ پاکستان ڈیہہ ٹی امن و سوگوی نا خواہندار ءِ۔ بھارت نا کنڈآن لین آف کنٹرول نا پدریسہ خلاف ورزی و شاری آبادی تے شست کننگ ، جہانی کانود و بنداوی انسانی حق انا خلاف ورزی ءِ۔ شاہ محمود قریشی پارے کہ اقوام متحدہ نا سیکرٹری جنرل، صدر سیکورٹی کونسل و او آئی سی نا سیکرٹری جنرل ءِ ہم بھارت نا دا مذموم عزم آن معلومدار کرینن۔ بھارت تینا ہندو توا پالیسی تا سوب آن مچ آ ڈیہہ نا امن ءِ گہیو تخنگ ءِ، جہانی برادری دابھارتی رویہ نا نوٹس ءِ ہلے۔ بھارتی کمامدارآتا غیرزموارانہ بیان آتیان ہندوستان نا ہبکہ ئی پیدوار مسنے۔ مخدوم شاہ محمود قریشی پارے کہ بھارت سرکار تینا داخلی حالیت آتیان، دنیا نا چکار ءِ اسہ کنڈ کننگ کن، گندہ انگا چم آتے کاریم اٹ اتنگ ءِ۔ مخدوم شاہ محمود قریشی پارے کہ پاکستان، اوغان امن عمل تون اوار ڈیہہ ٹی امن و سوگوی کن تینا مخلصانہ کوشست آتے برجاتخک۔
