کوئٹہ۔ 15 جون (اے پی پی) صوبائی وزیر داخلہ میر ضیاء اللہ لانگو پارینے کہ صوبہ ٹی ہراڑے کروناوائرس تون مون تننگ کن غٹ تر بنداوی گام گیج چست کننگ ءِہموڑے کشت وکشار و کشاری بشخ اٹی ملخ آتا سنگین حالیت آتا ہم مون تروک ءِ ہراڑکن ایمرجنسی اینخو سال جنوری ٹی نافذ کننگاسس و دانا توننگ و عملی گام گیج آتے ٹی محکمہ کشت وکشار تون صوبائی ڈیزاسٹرمینجمنٹ اتھارٹی ہلہلہ ئی گام گیج و دافتا توننگ وتلف کننگ کن اسپرے ہڑدے ئی بنداو تیا کننگ ءِ، اوپارے کہ کشت وکشار ننا زرگزران کن تمبہ نا حیثیت تخک۔ داخیال آتا درشانی ءِ او صوبائی وزیر کشت وکشار زمرک خان اچکزئی ءِ صوبائی ڈیزاسٹرمینجمںٹ اتھارٹی نا کنڈآن ملخ آتا اسپرے کن کاریم اٹ اتوک آ ٹیکٹر آتا بابت دود اٹی پریس کانفرنس آن تران کرساکرے داوخت آ صوبائی وزیر کشت وکشار صوبائی ڈیزاسٹرمینجمنٹ اتھارٹی نا گام گیج آتا ستاءِ کرسا و صوبائی وزیر داخلہ نا پبی کمکاری نا منت واری ءِ ہرفا داہیت انا درشانی ءِ کرے کہ دا10 ٹیکٹر آتا بننگ آن محکمہ کشت وکشار نا کاریم نا کچ اٹی ودکی مننگ کیک و او گچین وڑاٹ ملخ آتون مون تننگ کیرہ۔ داوخت آ صوبائی وزیر داخلہ میر ضیاء اللہ لانگو حکومت بلوچستان داہیت آن جوانی اٹ بلد ءِ کہ ملخ آک کشت وکشار و کشاری بشخ آ بے کچ منفی زہم مرتب کرینے اسہ کنڈآ کشار گر آتے کروڑ آ روپئی نا نسخان مسنے تو ایلو کنڈآ فوڈ سیکورٹی نا سنگین ویل ہم مون تروک مریک ہراکہ چیلنج اسے آن کم اف۔ وزیراعلیٰ بلوچستان جام کمال خان نا پارت آتے مون آ تخسا غٹ تعلقدار محکمہ غاک ملخ آتا چٹفنگ کن خاطرخواہ گام گیج کننگ ءُ وخت اس کہ پی ڈی ایم اے نا کمک ہر کہول آ تعلقدار محکمہ غاتون مریک۔ داوخت آ صوبائی وزیر کشت وکشار انجینیئر زمرک خان اچکزئی پارے کہ داوخت اسکان ملخ آتیان فصل آتے پبی نسخان رسینگاہائی رسک ضلع غاتے ٹی پدریسہ چاروکی کن ٹیمک دے و نن کاریم کننگ ءُ صوبائی حکومت ملخ آتا جلہو آن فصل آتے رکھ کننگ کن لوکسٹ سرویلنس اینڈ کنٹرول اسٹریٹجی اس جوڑ کرینے۔ ہرانا رداٹ ایلو گام گیج آتیان بیدس ہندی بزغر آتے آگاہی کن بھلو کچ اسے آ مہم اس ہم چلیفنگک اوپارے کہ بلوچستان نا گڑاس ضلع غاتیان بدیس ایلو غٹ ضلع غاک ملخ آتیان زہمی مسنو ہرانا سوب کشارگر آتے بھلو کچ اسے آ نسخان مس ہرانا سوب آن صوبائی حکومت و زمیندار آتا سوب آن ایگریکلچر ڈیپارٹمنٹ دے و نن ہلہلہ ئی حالیت آتے ٹی دانا توننگ کن کاریم کننگ ءُ۔
