لاہور۔ 15 جون (اے پی پی) پنجاب نا بروک آ مالی سال 2020-21ء نا 22 کھرب40 ارب روپئی حجم نا شمولیتی بجٹ ءِ پیش کننگا، شونداری بجٹ کن 337 ارب روپئی نا زر جتاکننگانے، این ایف سی ایوارڈ نا رداٹ صوبہ ءِ 1433 ارب روپئی مہیا کننگک، صوبائی محصولات آتے ٹی 317 ارب روپئی نا ہدف مقرر کننگانے، فیڈرل ڈویژیبل پول آن محصولات آتا وصولی 4963 ارب روپئی گمانی ءِ۔ بروک آ مالی سال اٹی 56 ارب روپئی آن زیات نا خراج ریلیف پیکج تننگک، جاریہ خڑچ آتا کچ 13 کھرب 18 ارب روپئی تخنگانے، تنخواہ تا بجٹ 337 ارب 60 کروڑ روپئی آ منجمد کننگا، بجٹ اٹی جان جوڑی نا بشخ اکن 284 ارب 20 کروڑ روپئی ، تعلیم نا بشخ اکن 391 ارب روپئی آن زیات نا زر جتا کننگانے۔ بجٹ اٹی 106 ارب روپئی کورونا زہمی تیکن جتا کننگا۔ بجٹ اٹی کورونا نا دین انا مون ءِ توننگ کن 13 ارب روپئی تخنگانے و دوائی تا ہلنگ نا بجٹ تدوک آ سال انا 23 ارب روپئی نا مقابلہ ٹی 26 ارب روپئی آن زیات کننگانے بجٹ اٹی سروسز آ جی ایس ٹی نا مد اٹی تروک آ ریلیف پیکج اٹی ہیلتھ انشورنس، ڈاکٹر آتا مشورہ فیس و ہسپتال آتیا خراج نا کچ ءِ زیرو درسد کننگ وخت ا س کہ 20 آن زیات سروسز آ خراج ریٹ 16 درسد آن 5 درسد کننگ نا سلاہ ءِ ، پراپرٹی بلڈرز آن 50 روپئی فی مربع فٹ و ڈویلیپرز آن 100 روپئی فی مربع گز خراج ہلنگ نا سلاہ ءِ ہرا بندغ پراپرٹی بلڈر و ڈویلیپرز آتا وڑاٹ خراج ادا کیک اودے کنسٹرکشن سروسز آن خراج چھوٹ مریک۔ ریسٹورنٹ و بیوٹی پارلرز آتیا کیش ادائیگی کروک آ صارف آتیان 16 درسد وخت اس کہ کریڈٹ یا ڈیبٹ کارڈ آن ادائیگی نا حالیت اٹ 5 درسد خراج ریٹ ہلنگک، غٹ سینما گھر تے 30 جون 2021ء اسکان انٹرٹینمنٹ ڈیوٹی آن استثنیٰ کننگ نا سلاہ ءِ، پنجاب اسمبلی ٹی بجٹ تقریر اٹی صوبائی وزیر خزانہ مخدوم ہاشم جواں بخت پارے کہ بروک آ مالی سال اٹی پراپرٹی خراج نا ادائیگی ءِ اِراقسط اٹی کننگک و 30 ستمبر 2020ء اسکان پورو خراج نا ادائیگی نا حالیت اٹ خراج تروک آتے 5 درسد نا جاگہ غا 10 درسد ری بیٹ تننگک وسرچارج نا وصولی آ پورو چھوٹ مریک۔ انٹرٹینمنٹ ڈیوٹی نا کچءِ 20 درسد آن کم کرسا 5 درسد کننگ نا سلاہ ءِ، پراپرٹی خراج نا پوسکن آ ویلیوایشن ٹیبل نا اطلاق ہم اسہ سال اکن ہم موخر کننگانے، گاڈی تا رجسٹریشن و ٹوکن خراج نا پورو ادائیگی نا حالیت اٹی 10 درسد نا جاگہ غا 20 درسد ری بیٹ تننگک۔ سٹمپ ڈیوٹی نا ساڑی آ کچ ءِ 5 درسد آن کم کرسا اسہ درسد کننگ نا سلاہ ءِ، ہندی حکومت آتا خراج آتیان کاروبار نالیسن نا بابت فیس زیرو درسد کننگ نا اصولی فیصلہ ءِ کننگانے ہراڑآن ہندی آبادی ءِ 60 کروڑ سالانہ خراج ریلیف ملک، بروک آ بجٹ اٹی سروس ڈیلیوری خڑچ آتے ٹی ہم 10 ارب روپئی آن زیات نا کمتی کننگانے وخت اس کہ ہندی حکومت آتا بجٹ اٹی 10 ارب روپئی آن زیات نا ودکی کننگانے، بجٹ اٹی شونداری پروگرام اٹی 97 ارب 66 کروڑ روپئی سوشل سیکٹر، 77 ارب 86 کروڑ روپئی انفراسٹرکچر ڈویلپمنٹ ، 17 ارب 35 کروڑ پروڈکشن سیکٹر، 45 ارب 38 کروڑ روپئی سروسز سیکٹر، 51 ارب 24 کروڑ روپئی ایلو بشخ جاٹ، 47 ارب 50 کروڑروپئی اسپیشل پروگرام و 25 ارب روپئی پبلک پرائیویٹ پارٹنر شپ انا مد اٹی تخنگانے۔ ملخ آتون مون تننگ کن بجٹ اٹی 4 ارب روپئی آن زیات نا زر جتا کننگ نا سلاہ ءِ ہرافتیان اسہ ارب روپئی پی ڈی ایم اے ءِ تننگک، بجٹ اٹی کشت وکشار نا بشخ اکن 31 ارب 73 کروڑ روپئی نا زر جتا کننگ انگ ءِ ۔ بروک آ مالی سال اٹی خولم ہلنگ کن 331 ارب 90 کروڑ روپئی جتا کننگانے، لائیو اسٹاک اینڈ ڈیری ڈویلپمنٹ کن 13 ارب 30 کروڑ روپئی نا زر جتا کننگانے۔ محکمہ جنگلات کن جم وڑاٹ 8 ارب 73 کروڑ روپئی نا زر تخنگانے، آب پاک اتھارٹی کن 2 ارب 85 کروڑ روپئی نا زر، محکمہ آبپاشی ءِ 37 ارب 40 کروڑ روپئی، مذہبی سیل وسوات نا مون آدننگ کن 2 ارب آن زیات نا زر جتا کننگ انگ ءِ، پوسکن آپاکستان مزل آسان پروگرام نا 15 ارب مالیت نا ارٹ میکومرحلہ نا بناءِ کننگک ہراڑکن 10 ارب روپئی نا زر جتاکننگانے۔
