داوخت ملک اٹی 4800 وینٹی لیٹرز ساڑی ءِ پین 1600 نا بھاز زوت ودکی مریک، این۔ 95 و وینٹی لیٹر ہندی وڑاٹ تیار کننگ انگ ءِ دیوان ءِ بریفنگ
اسلام آباد۔ 15 جون (اے پی پی) وزیراعظم عمران خان پارینے کہ زہمی علاقہ غاتے ٹی سمارٹ لاک ڈاؤن کن صوبہ غاتے پارت جاری کرینن، رکھی گام گیج آتا سوب کوروناوائرس نا تالانی ءِ گچین وڑاٹ توننگ مریک، الس نا کمک حکومتی کوشست آتے سرسہب کننگ اٹ بھاز اہمیت تخک۔ داخیال آتا درشانی ءِ او تینا کماشی ٹی کوروناوائرس نا دین انا حالیت آتا بابت جاچ دیون آن تران کرسا کرے۔ دیوان اٹی بنجائی وزیر حوالکاری و شینکاری سینیٹر شبلی فراز، بنجائی وزیر ڈٹ بندی اسد عمر، بنجائی وزیر داخلہ اعجاز شاہ، بنجائی وزیر صنعت و پیداوار محمد حماد اظہر، سلاہکار خزانہ ڈاکٹر حفیظ شیخ، خصوصی کمکار حوالکاری لیفٹیننٹ جنرل (ر) عاصم سلیم باجوہ، فوکل پرسن کوویڈ۔ 19 ڈاکٹر فیصل سلطان، چیئرمین این ڈی ایم اے و سینئر آفیسر آک بشخ ہلکر۔ دیوان اٹی کوروناوائرس نا ساڑی حالیت، بروک آ منہ دے تا کساس و حالیت آتون مون تننگ کن کروک آ گام گیج آتیا سجفنگا۔ دیوان اٹی ملک انا چندی صوبہ غاتے ٹی کورونا ناجوڑ آتے کن ساڑی کٹ، آکسیجن، وینٹی لیٹرز و آسراتی تا ساڑی حالیت و دافتے ٹی ودکی کن کروک آ گام گیج آتا ہم جاچ ءِ ہلنگا۔ دیوان ءِ پاننگانے کہ داوخت ملک اٹی کوروناوائرس نا ٹیسٹ کروک آ 107 لیبارٹریز کاریم کننگ ءُ و ہڑدے ئی بنداو آ 25 ہزار ٹیسٹ کننگ انگ ءِ، بناٹی اوفتا کچ بیرہ 2 ئس۔ دیوان ءِ پاننگاکہ داوخت ملک اٹی 4800 وینٹی لیٹر ساڑی ءُ۔ بناٹی اوفتا کل کچ 700 ئس۔ ساڑی 4 ہزار 8 سد وینٹی لیٹرز اٹی پین 16 سد نا ودکی بھاز زوت مریک، ملک اٹی این۔ 95و وینٹی لیٹرز ہندی وڑاٹ تیار کننگ انگ ءِ۔ دیوان ءِ پاننگاکہ جولائی اسکان غٹ صوبہ غاتا چندی ہسپتال آتے ٹی 2 ہزار کوویڈ۔ 19 کٹ آتا پین ودکی کننگک۔ کوروناغان زہمی علاقہ غاتے ٹی سمارٹ لاک ڈاؤن نا بابت دیوان ءِ پاننگاکہ ملک انا 20 بھلا شار تیٹی ہمو ہند آتا پیدواری ءِ کننگانے ہراڑے کوروناغان زہمی بندغ آتا کچ زیات ءِ و ہراڑے صوبائی حکومت آک و ضلعی انتظامیہ نا کنڈآن انتظامی گام گیج کننگ نا گرج ءِ۔ وزیراعظم داہیت آ است جمی نا درشانی ءِ کرے کہ مچ آ ملک اٹی کورونابابت رکھی لویس و پرسنل پروٹیکٹیو کٹس آتا غٹ گرج آتے جوان وڑاٹ پورو کننگ انگ ءِ۔ وزیراعظم دیوان آن تران کرسا پارے کہ رکھی گام گیج آتا سوب کورونا نا تالانی ءِ گچین وڑاٹ توننگ مریک۔ دارداٹ الس نا کلیدی کڑد ءِ۔ اوپارے کہ داوخت اسکان مون آ بروک آ کساس آتے مون آ تخسا حکومت نا کنڈآن ہرگمانی گام گیج چست کننگ انگ ءِ ولے دا بابت الس نا کمک حکومتی کوشست آتے سرسہب کننگ اٹ اہم ءُ کڑد اس تخک۔ وزیراعظم پارت کرے کہ غٹ ہندی سرکڑدہ و لیڈرشپ تینا تینا علاقہ غاتے ٹی انتظامیہ نا کمک اٹ نئے بیرہ ہسپتال آتے ٹی کوویڈ۔ 19 آسراتی تا جاچ ءِ ہلیر بلکن تینا تینا حلقہ غاتا الس نا رکھی گام گیج آتا بابت کمک ءِ پک کننگ اٹ ہم متحرک کڑد اداکیر۔ وزیراعظم پارے کہ صوبہ غاتے زہمی علاقہ غاتے ٹی سمارٹ لاک ڈاؤن کن پارت جاری کننگانے۔ دا بابت ڈغاری راستکی تے مون آ تخسا ہندن ءُ گام گیج کننگے تانکہ بروک آ منہ مشکل ہفتہ غاتے ٹی رکھی گام گیج و زرگزرانی سرجزآتے ٹی توازن تخنگ مرے۔ وزیراعظم کوویڈَ۔ 19 ناجوڑ آتا کاریم اٹ بروک آ منہ دوائی و انجکشن تا دوئی کننگ اٹ مشکل آتا نوٹس ءِ ہلسا چیئرمین این ڈی ایم اے ءِ پارت کرے کہ دا ہیت ءِ پک کننگے کہ درکار دوائی و انجکشن باآسانی دُوبرے۔
