اسلام آباد۔ 15 جون (اے پی پی) مزن وزیر عمران خا ءِ سروکی ءَ نوکیں پاکستان ہائوسنگ منصوبگ ءِ چیر دستی ءَ کمو کٹ کنوکیں مردم آنی واستہ گس آنی جوڑیشت ءِ شوبگ ءِ دیمروئی ءِ واستہ چست کتگیں حکومتی گامگیج آنی ھوالگ ءَ چار ءُ تپاسی دیوان ءِ برجم دارگ بوت ۔ مزن وزیر میڈیا ونگ ءِ نیمگ ءَ جاڑی بوتگیں بیان ءِ رد ءَ دیوان ءَ چئیرمیں نوکیں پاکستان ہائوسنگ اتھارٹی لیفٹیننٹ جنرل (ر) انور علی حیدر ءُ کلانہ ایں اپسرگ شریک اتنت وھدیکہ گورنر سٹیٹ بنک رض باقر، پیسریگیں وزیر ھزانگ شوکت ترین ، عارف حبیب، مدثر خان ، عقیل کریم ڈھیڈی، حسن بخشی ءُ ایندگر آں ویڈیو لنک ءِ وسیلگ ءَ دیوان ءَ بھر زوری کت۔ چئیرمین نوکیں پاکستان ہائوسنگ اتھارٹی ءَ گوشت کہ کورونا وائرس ءِ جاور ھال آنی رد ءَ جوڑیشت ءِ شوبگ ءَ را دیمروئی ءُ نوکیں پاکستان ہائوسنگ منصوبگ ءَ را دیم ءَ جنزینگ ءِ ھوالگ ءَ جوڑیشت ءِ شوبگ ءَ گوں سیادی داروکیں کلانہ آنی تھنک ٹینک جوڑ کنگ بوتگ۔ ایشی ءَ جوڑیشت ءِ شوبگ ءِ دیمروئی ھاسیں رنگ ءَ کمو کٹ کنوکیں مردم آنی واستہ گس آنی جوڑیشت ءِ واستہ مالی آسراتی ءَ انتظام ءُ اے رد ءَ وتی کتگیں کار رپک ءِ ھوالگ ءَ سپارش رد ءُ بند کتگ انت۔ جوڑیشت ءِ شوبگ ءَ آسراتی آنی ھوالگ ءَ گوشگ بوت کہ ماڑی آنی ٹرانسفر ءُ ریجسٹریشن ءِ رد ءَ جتگیں فیس آنی تہ ءَ کمی آرگ بوتگ ءُ ایشی ءِ سیم سر پنجاپ ءُ صوبہ خیبر پختونخوا ءَ کنگ بوتگ۔ ایشی ءَ ابید نوکیں پاکستان ہائوسنگ اتھارٹی ءِ نیمگ ءَ چہ ڈویلپرز ءُ بلڈرز آنی آسراتی ءِ واستہ ھاسیں گامگیج کنگ بوھگ ءَ انت تانکہ آ جوڑیشت ءِ شوبگ ءَ حکومت ءِ نیمگ ءَ داتگیں آسراتی آں چہ آسانی ءَ گوں سیت مند بوت کناں۔ دیوان ءَ جوڑیشت ءِ شوبگ ءِ دیمروئی ءِ ھوالگ ءَ جوڑ کتگیں تھنک ٹینک ءِسپارش آنی سر ءَ سرجمیں رنگ ءَ چار ءُ بچار کنگ بوت۔ مزن وزیر ءَ دیوان ءَ گوں گشتانک دیان ءَ گوشت کہ نوکیں پاکستان ہائوسنگ منصوبگ معیشت ءِ یک شل ءَ جاڑی بوھگ ءِ ھوالگ ءَ استیں حکومت ءِ درستاں چہ مستریں منصوبگ ات ایشی ءَ چہ بازیں بندوکیں صنعت آناں دیمروئی رسیت۔ آئی ءَ گوشت کہ کورونا ءِ جاور ھال آنی رد ءَ حکومت ءَ جوڑیشت ءِ شوبگ ءِ دیمروئی ءِ سر ءَ ھاسیں دلگوشی داتگ ایشی ءَ چہ اے پڑ جوانی ءَ گوں دیمروئی بکنت ءُ کم کٹ کنوکیں مردم آناں گس ءِ پجاری دل یکیمی بہ بیت۔ آئی ءَ گوشت کہ نوکیں پاکستان ہائوسنگ منصوبگ ءِ سرجمی ءِ واستہ 30 ارب کلدار ءِ کمک پجاری کنگ ءَ انت تانکہ کم کٹ کنوکیں مردم آناں زاتی گس پجاری کنگ ءِ منصوبگ ءَ را دیم ءَ جنزینگ بہ بیت۔ مزن وزیر ءَ پنت ءُ شون کت کہ کمرشل بنک آں گوں شور ءُ مشور ءَ چہ تھنک ٹینک ءِ سپارش آناں پکوئیں رنگ دیگ بہ بیت تانکہ نوکیں پاکستان ہائوسنگ منصوبگ ءِ چیر دستی ءَ گس آنی جوڑیشت ءِ منصوبگ آنی واستہ مالی آسراتی پیداک کنگ ءَ را دل یکیمی جوڑ کنگ بہ بیت۔ مزن وزیر ءَ پنت ءُ شون کت کہ نوکیں پاکستان ہائوسنگ اتھارٹی ءِ چیر دستی ءَ سٹیٹ بنک، سیادی داروکیں وزارت ، صوبائی حکومت ءُ سیادی داروکیں صوبائی محکمہ آنی نماھندگ آنی ھاسیں سیل جوڑ کنگ بہ بیت تانکہ کوآرڈینیشن ءَ را گہتر کنان ءَ جوڑیشت ءِ ھوالگ ءَ ایشوز آناں فاسٹ ٹریک بنیات آنی سر ءَ گیواری دل یکیمی بوت بہ کنت۔
