اسلام آباد۔ 15 جون (اے پی پی) مزن وزیر عمران خان ءِ سروکی ءَ سرجمیں ملک ءَ ھمروچگیں سامان آنی قیمت آنی تہ ءَ کمی آرگ ءِ ھوالگ ءَ گامگیج آنی سر ءَ چار ءُ تپاسی دیوان ءِ برجم دارگ بوت۔ مزن وزیر کارگس ءِ نیمگ ءَ جاڑی بوتگیں ھال آنی رد ءَ اے دیوان ءِ تہ ءَ وزیر برائے نیشنل فوڈ سیکورٹی سید فخر امام، مشیر ھزانگ ڈاکٹر عبدالحفیظ شیخ، مشیر تجارت عبدالرزاق دائود، ھاسیں کمکار ڈاکٹر شہباز گل ءُ کلانہ ایں اپسرگ آں بھر زوری کت۔ صوبائی چیف سیکرٹری صاحب آں ویڈیو لنک ءِ وسیلگ ءَ دیوان ءَ بھر زوری کت۔ چاریں صوبائی چیف سیکرٹری صاحب آں مزن وزیر ءَ را بنیاتی ھمروچگیں وردن ءُ واراکی سامان آنی تہ ءَ کمی آرگ ءِ ھوالگ ءَ ھاسیں رنگ ءَ حکومت ءِ نیمگ ءَ پٹرول ءُ ڈیزل ءِ نیاد آنی تہ ءَ کمی آرگ ءُ راستیں رنگ ءَ اے کمی ریلیف آناں الس آں تاں پجارینگ ءَ دل یکیمی جوڑ کنگ ءِ ھوالگ ءَ گامگیج آنی سر ءَ بریفنگ دات۔ مزن وزیر ءَ را ھمروچگیں وردن ءُ وراکی چیز آناں امبار ءَ چیر دیوک ءُ ملاوٹ کنوک آنی ھلاپ ءَ انتظامی گامگیج آنی سر ءَ سرجمیں بریفنگ دیگ بوت۔ دیوان ءَ را گوشگ بوت کہ گندم ءِ صوبگ آنی یک ءُ دگر ءَ روگ ءُ آیگ ءِ پد ءَ جوانیں سیت آنی سہرا بوھگ بندات بوتگ، پدا ھم گوشگ بوت کہ آرت ءِ قیمت ءِ تہ ءَ گیش کمی آرگ ءِ ھوالگ ءَ گامگیج کنگ بوھگ ءَ انت۔ مزن وزیر ءَ دیوان ءَ گوں گشتانک دیان ءَ گوشت کہ حکومت ءِ نیمگ ءَ پٹرول ءُ ڈیزل ءِ قمیمت ءِ تہ ءَ کمی آرگ ءِ مول ءُ مراد الس آناں ھمک رنگ ءَ ریلیف پجارینگ انت۔ آئی ءَ پنت ءُ شون کت کہ حکومتی پیسلہ ءِ برورد سرجمیں ملک ءِ الس آں تاں پجارینگ ءِ واستہ توامیں صوبائی چیف سیکرٹری یکجائی گامگیج رد ءُ بند بدینت۔ ھمروچگیں سامان آنی تہ ءَ ملاوٹ کنگ ءِ ھوالگ ءَ تران کنان ءَ مزن وزیر ءَ گوشت کہ ملاوٹ کنگ ءِ ھرابیں رند پد مئے زھگ، پیریں ءُ راج ءِ جان سلامتی ءِھرابی ءِسبب جوڑ بوھگ ءَانت۔ گوستگیں وھد ءَ ملاوٹ کنگ ءِ سلکاری ءَ را ڈلگچار کنگ بوتگ۔ آئی ءَ گوشت کہ ساپیں سامان آنی استی گڈ گورننس ءَ را سہرا کنت ھمے ھاترا اے جزم ءِ سر ءَ ھاسیں دلگوشی دیگ بہ بیت۔ سرجمیں ملک ءَگندم ءِ مزنیں کساس ءَ پجاری ءِ گوما آرت ءِ قیمت آنی تہ ءَ کمی آرگ ءِ ھوالگ ءَ مزن وزیر ءَ نیشنل پرائس کنٹرول کمیٹی ءَ را پنت ءُ شون کت کہ اے رد ءَ توامیں گامگیج چست کنگ بہ بنت تانکہ الس آناں الکاپیں قیمت ءَ آرت ءِ پجاری دل یکیمی کنگ بہ بیت۔
