کوروناوائرس نا جہانی دین انا زرگزرانی زہم آتون مون تننگ کن پاکستان ءِ تینا برآمدآتے ودفوئی مریک، کنٹری ڈائریکٹر جہانی بینک

اسلام آباد۔ 15 جون (اے پی پی) جہانی بینک پارینے کہ کوروناوائرس نا جہانی دین انا زرگزرانی زہم آتون مون تننگ کن پاکستان ءِ تینا برآمد آتے ودفوئی و اوفتے گچین کروئی مریک۔ داہیت ءِ پاکستان اٹی جہانی بینک انا کنٹری ڈائریکٹر الانگوپیچوموتو دوشنبے نادے آ تینا ٹویٹ و منسلکہ بلاگ اٹی پارینے۔ اوپارے کہ پاکستان کوروناوائرس نا جہانی دین آن زہمی مروک آ ملک آتے ٹی اوار ءِ، دادین پاکستان نا برآمد آتے ہم شست کرینے، مئی نا تُواٹی پاکستان نا برآمد آتا کچ 1.39رب ڈالر ریکارڈ کننگانے ہرا تدوک آ سال انا ہندا وخت انا مقابلہ ٹی 34 درسد کم ءُ۔ اوپارے کہ پاکستان نا زرگزرانی بحالی ٹی برآمدآتا کلیدی ءُ کڑد اسے۔ برآمدآک مزور آتے،روزگار نا وارخواہی تے ودفنگ و ڈالر کٹیا نا اہم ءُ ذریعہ سے۔ اوپارے کہ جند انا رکھ انا ازباب و گڑاتا جہانی مارکیٹ اٹی پاکستان ءِ تقابلی وڑاٹ گچین ءُ پوزیشن اس دوئی ءِ۔ ہندارداٹ کوروناوائرس نا جہانی دین انا زرگزرانی زہم آتون مون تننگ و ودکی و شونداری کن پاکستان ءِ تینا برآمد آتے ودفوئی و اوفتے گچین کروئی مریک۔