اسلام آباد۔ 15 جون (اے پی پی) پاکستان تحریک انصاف نا راہشون نورین فاروق ابراہیم پارینے کہ وزیراعظم عمران خان وار وار آ پارینے کہ کوروناوائرس نا سوب ملک اٹی پورو لاک ڈاؤن کننگ کپنہ، الس ایس او پی تیا عملدرآمد کے، حکومت مشکل حالیت آتے ٹی الس آ اسہ وڑنا ہم پوسکن آ خراج آتا بھاریم ءِ شاغتو، بروک آ مالی سال انا خراج فری بجٹ ءِ، پاکستان تحریک انصاف نا حکومت مستین نا حکومت آتاہلوک آ وام تا سود انا مد اٹی وام تے پدی تننگ ءِ۔ دوشنبے نادے آ اے پی پی تون خصوصی گپ وتران کرسا نورین فاروق ابراہیم پارے کہ مچ آ دنیا ءِ داوخت آ کورونا نا دین تینا پلویڑ اٹی ہلکونے شون ہلوک ملک آک و پدتموک ملک آک ہم کورونانا دین انا چٹفنگ اٹ بے سہب ءُ و دادین انا داوخت اسکان درمان ءِ خننگتنے۔ اوپارے کہ ساڑی حکومت مشکل زرگزرانی حالیت آتیان پد ہم متوازن بجٹ اس تسنے و بروک آ مالی سال انا بجٹ خراج فری بجٹ اس تسنے الس آ اسہ وڑناہم پوسکن ءُ خراج خلتنے۔نورین فاروقی ابراہیم پارے کہ جہانی مالیاتی ادارہ آئی ایم ایف حکومت آن خواست کریسس کہ سرکاری ملازم آتا تنخواہ تیٹی کٹوتی کننگے ولے حکومت دا خواست ءِ مسترد کرےو سرکاری ملازم آتا تنخواہ تے برقرار تخانے۔ اوپارے کہ مستین نا حکومت آک تینا عیاشی تیکن بھلوکچ اسے آ سود آ وام ہلکر داسہ ساڑی حکومت مستین نا حکومت آتا ہلوک آ وام تا بیرہ سود انا مد اٹی مروک آ وام تا پدی تننگ ءِ وخت اس کہ وام تا اصل پیسہ غاک ہندن آن ہندن ءُ۔ اوپارے کہ حکومت 1240 ارب روپئی شونداری ڈٹ آتے کن ہرافتیان 630 ارب روپئی پوسکن آ ڈٹ آتے کن جتا کننگانے و دارالحکومت اٹی جان جوڑی نا بشخ اکن 20 ارب روپئی ہم جتا کرینے۔ کوروناوائرس نا سوب لاک ڈاؤن نا سوج انا ورندی ٹی او پارے کہ وزیراعظم عمران خان وار وار آ پارینے کہ ننا ملک انا الس پورو لاک ڈاؤن نا متحمل مننگ کپک اول اٹ مارچ آن ہرا سمارٹ لاک ڈاؤن خلنگا داڑآن بھلو حداسسکان دا دین ءِ کنٹرول کننگ اٹ کمک رسینگا ولے دانا پورو لاک ڈاؤن خلنگ داخاطرآن مشکل ءِ مزور تپہ کن بھاز مشکل مسکہ اوفتا اُرانا چولہا تے بند کروئی اف۔
