اسلام آباد۔ 15 جون (اے پی پی) وزیر خارجہ مخدوم شاہ محمود قریشی پارینے کہ ہندوستان نا عزم ءِ بے نقاب کننگ کن نن تون بھاز انگا فورمز آک اریر، گچینی ءِ نن تینا اولیت آتا رداٹ کننگ اُن و کرسا کینہ۔ دوشنبے نادے آ تینا اسہ بیان اسے ٹی وزیر خارجہ پارے کہ سیکورٹی کونسل نا ممبر شپ نا دوئی کننگ نا خاص ءُ وڑوڈول اسے۔ سیکورٹی کونسل نا ممبر شپ نا است خواہ ملک آک، کیہی سال اسکان داڑکن لابنگ کیرہ۔ اوپارے کہ ہر ملک انا تینا استحقاق اسے۔ بھارت و پاکستان ہفت ہفت وار سیکورٹی کونسل نا باسک رہینگانو۔ دا سوج مریک بھارت نا منفی رویہ نا، ہرا مچ آ دنیا نا مون آٹے و ہرا سیکورٹی کونسل نا قرارداد آتا حشر ءِ کرینے و ہراوڑاو مقبوضہ جموں و کشمیر اٹی انسانی حق انا خلاف ورزی تا چرجوئی نا بناءِ کرینے تو اودے تینا رویہ غا نظر شاغنگ نا گرج ءِ۔ وزیر خارجہ پارے کہ ہراتسکان سیکورٹی کونسل نا ممبر شپ انا تعلق ءِ تو دانا اسہ مرغن ءُ وڑوڈول اسے ، پاکستان ہم تینا ممبر شپ اکن لابنگ کننگ ءِ ولے نن سفارتی قدر ءِ ملحوظ خاطر تخسا تینا لائحہ عمل اس جوڑ کینہ۔ ہندوستان نا عزم ءِ بے نقاب کننگ کن نن تون بھاز انگا فورم آک اریر و بھاز انگا کسر آک ہم ہرافتا گچینی ءِ نن تینا اولیت آتا رداٹ کننگ اُن و کرسا کینہ۔
