ملخ آتا برخلاف آپریشن نا رداٹ تدوک آ 24 گھنٹہ ٹی 3 لکھ 39 ہزار ایکڑ رقبہ نا سروے مس، نیشنل ڈیزاسٹرمینجمنٹ اتھارٹی

اسلام آباد۔ 13 جون (اے پی پی) مچ آ ملک اٹی ملخ آتا برخلاف آپریشن نا رداٹ تدوک آ 24 گھنٹہ ٹی 3 لکھ 39 ہزار ایکڑ رقبہ نا سروے مس وخت اس کہ 5 ہزار 630 ایکڑ رقبہ غا ملخ آتے تلف کروک آ دوائی تا اسپرے کننگا۔ آپریشن اٹی 1259اسیجا ٹیمک بشخ ہلکر۔ ۔ نیشنل ڈیزاسٹرمینجمنٹ اتھارٹی نا ترجمان نا رداٹ داوخت آ ملک انا 45 ضلع غاتے ٹی ملخ آک اریر۔ بلوچستان نا 29، خیبر پختونخوانا 9، پنجاب نا 3 و سندھ انا 4 ضلع ملخ آتیان زہمی مسنو۔ بلوچستان اٹی خضدار، آواران، نوشکی، چاغی، گوادر، اوتھل، کیچ، پنجگور، خاران، واشک و کوئٹہ غان بیدس ایلو ضلع غاک ہم زہمی مسنو۔ کے پی ٹی ڈیرہ اسماعیل خان، ٹانک، قطبی و سویلی وزیرستان ، لکی مروت، کرک، کرم، نوشہرہ، اورکزئی ، پشاوروخیبر نا ضلع غاک زہمی مسنو۔ سندھ اٹی خیبرپور، سانگھڑ، سکھر، شہید بے نظیر آباد، مٹیاری وجامشورو ٹی ملخ آتا جلہو مس۔ پنجاب اٹی اٹک، خانیوال و ڈیرہ غازی خان اٹی ملخ آتا حوال ملانے۔ ترجمان نا رداٹ ملخ آتا زہمی علاقہ غاتا سروے و کنٹرول آپریشن برجاءِ۔ 1259 ٹیم لوکسٹ کنٹرول آپریشن اٹی بشخ ہلکر۔ تدوک آ 24 گھنٹہ ٹی 3 لکھ 39 ہزار ایکڑ رقبہ نا سروے مس وخت اس کہ 5 ہزار 530 ایکڑ رقبہ غا ملخ آتے تلف کروک آ دوائی تااسپرے کننگا۔ ترجمان نا رداٹ بلوچستان اٹی 3 ہزار 100 ایکڑ رقبہ غا اسپرے کننگا۔ خیبر پختونخواٹی 1300 ایکڑ رقبہ نا ٹریٹمنٹ مس۔ پنجاب اٹی 30 ایکڑ رقبہ غا اسپرے مس۔ سندھ اٹی تدوک آ دے 1200 ایکڑ رقبہ ٹریٹمنٹ کننگا۔ داوخت اسکان مچ آ ملک اٹی 5 لکھ 96 ہزار ایکڑ رقبہ غا اسپرے کننگانے۔ قلعہ عبداللہ ٹی 300 ایکڑرقب غا ہوائی جہاز انا کمک اٹ کیمیائی اسپرے کننگا۔