نن بھارتی عزم ءِ چاہنگ آن پد ہم، دفاعی خڑچ آتا مد اٹی ودکی کتون، تانکہ مخلوق آ زیات بھاریم تمپ، وزیرخارجہ شاہ محمود قریشی

اسلام آباد۔ 13 جون (اے پی پی) وزیرخارجہ شاہ محمود قریشی پارینے کہ نن بھارتی عزم ءِ چاہنگ آن پد ہم، دفاعی خڑچ آتے ٹی ودکی کتون تانکہ مخلوق آ زیات بھاریم تمپ۔ زرگزران نا پہیہ سلنگ نا سوب آن ننا، محصولات آتے ٹی 800 ارب روپئی نا کمتی بسنے۔ مشکل حالیت آتے ٹی بے کچ جوان، است بڈ، واومیت آن پُرءُبجٹ اسے۔ ہفتہ نادے آ بنجائی بجٹ 2020-21 ء نا بابت ویڈیو کلہو اٹی وزیر خارجہ پارے کہ 2020-21ء نا بجٹ ءِ پیش کننگانے، کاش اپوزیشن نا رویہ سنجیدہ مسکہ۔ نناجی ڈی پی کٹیا ٹی ہرانسخان مسنے او 3000 ارب نا ءِ۔ 2020-21ء نا بجٹ غیر معمولی حالیت آتے ٹی پیش کننگا ہراتم کورونادین دنیا نا زرگزران تے سرفینے۔ اوپارے کہ زرگزران نا پہیہ سلنگ نا سوب آن ننا محصولات آتے ٹی 800 ارب روپئی ناکمتی بسنے۔ جولائی آن مارچ اسکان ننا برآمد آتے ٹی ودکی مس وخت اس کہ مارچ آن جون اسکان کورونانا سوب آن دافتے ٹی ترندی اتون کمتی بس۔ وزیر خارجہ پارے کہ مستین نا حکومت آتے کن مروک آ وام تیا سود انا زرتس اٹی ننا بجٹ نا بھاز بھلو بشخ اس خڑچ مریک۔ تحریک انصاف نا حکومت دا وام تے ہلتنے۔ دا مستین نا حکومت آک ہلکونوولے ننے اوفتا ادائیگی تے کروئی ءِ۔ داڑکن وزیراعظم عمران خان نا کوشست ءِ کہ نن نئے بیرہ پاکستان بلکن مچ آ پدتموک زرگزران تیکن جہانی مالیاتی ادارہ غان رعایت خوائسن۔ کنے خوشی ءِ کہ جی 20 و پیرس کلب ننے گڑاس رعایت تسنو۔ ننا چکار جہانی مالیاتی ادارہ غاتا کنڈآٹےتانکہ ننے پین رعایت ملنگ کےو پین وسیلہ دوئی مننگ آ نن اوفتے روزگارنا وارخواہی فراوان کننگ و نیزگاری ءِ چٹفنگ کن کاریم اٹ اتنگ کین۔ شاہ محمود قریشی پارے کہ 2020-21 ء نا بجٹ نا خاصیت دادے کہ حکومت ہچ ءُ پوسکن ءُ خراج اس خلتنے،الس آ بے جا بھاریم شاغتو، بلکن مستین نا بھاریم ءِ سبک کننگ نا کوشست کرینے، بالواسطہ خراج، ڈیوٹی و ٹیرف ءِ کم کننگا ریگولیٹری ڈیوٹی تے کم کرین۔ ننا کوشست ءِ کہ نن ایف بی آر اٹی اصلاحات آتا کمک اٹ خراج ہلنگ نا نظام ءِ گچین کرین۔ خراج نظام نا آٹومیشن آن خراج ہلنگ اٹ کم و ود گچینی بریک ولے داڑتون اواراوار کرپشن اٹی کمتی واقع مریک۔ نن کوشست کرینن کہ ہمو زرگزران ہرا جمود نا گواچی ئس۔دادے ولداآن رواں دواں کننگے داڑکن گروتھ نا مننگ المی ءِ، گروتھ کن نن مسہ گڑاتیا چکار کرین ۔ نن ہموسیکٹر آتے گچین کرینن ہراروزگار ودی کیرہ ۔ وزیر خارجہ پارے کہ کشت وکشار اسہ ہندن ءُ بشخ اسے ہرا داوخت آ ننا بجٹ اٹی اسہ بھلو زر اس جتاکرینے۔ ملخ آتا ہرا جلہو مسنے داڑتون مون تننگ کن دہ ارب نا زر دارداٹ جتا کننگانے۔ کشاری بشخ اکن پنجاارب نا اسہ پین زر اس جتا کننگانے۔ گروتھ ءِ ودفنگ کن ارٹ میکو سیکٹر، کنسٹرکشن نا ءِ ہراڑکن بھاز انگا آسودہی تا پڑو ءِ کننگانے تانکہ مخلوق دا سیکٹر اٹی زرکاری کیر۔ ننا کوشست ءِ کہ ننا گروتھ ریٹ منفی آن مثبت مرے کہ کم از کم اِرا درسد گروتھ کیر و بروک آ سال اٹی اودے ہمو کہول آ دننگے ہرانگیا اودے ہنوئی ءِ۔ ہندا گروتھ نا پہلو ءِ مون آ تخسا نن فیصلہ کرینن کہ پبلک سیکٹر ڈویلپمنٹ پروگرام اٹی ہچ ءُ کٹوتی اس کننگپک بلکن ودکی کننگک انتئے کہ گروتھ اٹی ودکی مریک تو روزگار ملک نیزگاری ٹی کمتی واقع مریک۔ وزیر خارجہ پارے کہ ہفت می نیشنل فنانس ایوارڈ بنجائی حکومت نا دوتے تفک انتئے کہ بلواسطہ، محصولات آتیان ہراکٹیا بریک اونا 60 درسد صوبہ غاتیا کاہک وخت کہ اس بنجا تون 40 درسد سلک۔ دامشکل حالیت آتے ٹی بھاز جوان، است بڈ، و اومیت آ پُر بجٹ اس تننگ آ ای وزیر خزانہ و اونا مچ آ ٹیم ءِ مبارکبادی ایتیوہ۔