اسلام آباد۔ 13 جون (اے پی پی) وزیراعظم نا خصوصی کمکار جان جوڑی ڈاکٹر ظفرمرزا کورونا نا ناجوڑ آتا کاریم اٹ اتوک آ انجکشن نا کاختی و زیات نرخ آ ہلنگ آ سختی اٹ نوٹس ہلسا ڈریپ ءِ پارت کرینے کہ کٹیا خور و نہاد آتیان زیات آ دوائی تے بہا کروک آتا برخلاف سخت کانودی کارروائی کننگے۔ ہفتہ نادے آ وزارت جان جوڑی نا ترجمان نا رداٹ کوروناٹی اختہ ناجوڑ مریض آتے کن ٹوسیلیزوماب(ایکٹیمرا) انجکشن 11952 فی وایل منظور مروک نہاد ءِ وخت اس کہ 200mgنا انجکشن 29882 فی وایل ءِ و 400mgنا انجکشن 59764 روپئی فی وایل ءِ۔ زیات ہلنگ نا غاوتے ڈریپ نا ٹول فری 080003727 نمبر آ درج کرفرہراڑآ ڈریپ کٹیا خور آتا برخلاف سخت کارروائی کیک۔ ڈاکٹر ظفرمرزا پارے کہ حکومت کوروناوائرس نا ناجوڑ آتے کن درمان کن گچین گام گیج آتے پک کننگ ءِ۔ مارکیٹ اٹی ریمڈیسویر انجکشن نا دوئی ءِ پک کننگ کن 2 اپورٹرز و 12 لوکل مینو فیکچرز آتے موکل تننگانے۔ دا چرجوئی ٹی ڈرگ پرائسنگ کمیٹی نا دیوان اس اڈتننگ نا ہم پارت کننگانے ہراٹی کانود نا رداٹ ریمڈیسویر ناکم آن کم نہاد نا تعین ءِ کننگک ولے حتمی منظوری ءِ بنجائی حکومت ایتک۔ اوپارے کہ داوخت اسکان ریمڈیسویر نا محدودمقدار بیرہ ناجوڑ آتے کن امپورٹ کننگاکہ وخت اس کہ پوسکن آ گام گیج آتارداٹ داسہ اِرا وافر مقدار اٹی ساڑی مریک۔ دادوائیک چندی ہسپتال آتا گرج آتے پورو کننگ کن اسہ مربوط میکنزم اسے نا کمک اٹ ناجوڑ مریض آتے کن بشخنگک۔ ایکٹیمرا انجکشن نا زیات نہاد ہلوک آتا برخلاف سخت کارروائی کننگک۔ کوروناٹی کاریم اٹ اتوک آ انجکشن نا مختصر فراوانی نا حوال آتیا نن دمدستی کارروائی نا بھلو کچ اسے آ کوشست آتیان پد تو سیلز وماب انجکشن نا دوئی نا حالیت آتے ٹی گچین مون آ بسنے۔
