استیں حکومت ءَ اولی سال 5 ہزار ارب کلدار ، جاڑیگیں مالی سال ءَ 2700 ارب کلدار ءِ ڈن ملکی وام ادا کتگ،
آیوکیں ملای سال ءَ 2900 ارب کلدار ءِ وام واپس کنگ ءَ آں، حکومت ءِ کار کرد ءِ سر ءَ چار ءُ تپاسی زوران ءَ اے کار آںاں ڈلگچار کنگ مہ بیت
حکومت ءَ گوستگیں سال ءَ سٹیٹ بینک ءِ یک ٹکہ ءِ وام نہ زرتگ، اچ ادارگ ءَ را سپلیمنٹری گرانٹ جاڑی نہ کتگ، اولی رند ءَ حکومت ءِ ھرچ ءُ درچ آمدنی ءَ چہ کم بوتگ
اسلام آباد۔ 13 جون (اے پی پی) مزن وزیر ءِ صلہ کار ڈاکٹر عبدالحفیظ شیخ ءَ گشتگ کہ مالی سال 2020-21ء ءِ ھاترءَ بنجاہی بجٹ ءَ تہءَ گرانیں جاورھالانی است بوہگءَ ابید ہم ایچ نوکیں ٹیکس مان کنگ نابوتگ، وام زورگ ءِ ایچ شوک ناایں ، گوست ءِ حکومت آنی وام ءُ سوتاں ادا کنگ ءِ ھاترءَ نوکیں وام زورگ بوہگءَ اِنت، نوکیں مالی سال ءَ 1600ءَچہ گیش سامان ءِ سرءَ ڈیوٹی ءَ را ہلاس کنگ بوتگ، بیپاری حرچءَ را کم کنگ ءِ ھاترءَ بازیں گامگیج چست کنگ بوہگ ءَ اِںت، نوکیں مالی سال ءَ 200ٹیرف لائنز ءِ سرءَ ڈیوٹی ءَ را کم کنگ بوہگءَ اِنت، 166ٹیرف لائنز ءِ سرءَ ریگولیٹری ڈیوٹی کم کنگ بوتگ، امپورٹ ءِ سرءَ ودہولڈنگ ٹیکس ءَ را کم کنگ بوہگءَ اِںت، سیمنٹ ءِ سرءَ ایکسائز ڈیوٹی ءِ تہ ءَ 25 کلدار کم کنگ ءِ سوج دیئگ بوتگ، تعمیرات ءِ پڑءِ ھاترءَ ٹیکس ءَ را نیم کنگ بوتگ، پٹرولیم ڈویلپمنٹ لیوی ءِ شرح 30 کلدار یک لیٹر اِنت ایشی ءِ تہءَ ایچ مٹی آرگ نا بوتگ، پاکستان ءُ آئی ایم ایف ءِ نیام ءَ سیادی باز جوان اَنت۔ شمبے ءِ روچءَ صنعت ءُ پیداوار ءِ بنجاہی وزیر حماد امجد، مزن وزیر ءِ صلہ کار عبدالرزاق داؤد، ایف بی آر ءِ چیئرمین ڈاکٹر نوشین جاوید امجد، حزانگ ءِ سیکرٹری نوید کامران بلوچ ءُ ایف بی آر ءِ لینڈریونیو باسک ڈاکٹر حامد عتیق سرور ءِ ہمرائی ءَ بجٹ ءَ پد پریس کانفرنس ءَ ڈاکٹر عبدالحفیظ شیخ ءَ گشتگ کہ انوگیں حکومت ءَ را بندات ءَ چہ گوست ءِ حکومت ءِ نیمگءَ 30 ہزار ارب کلدار ءِ وامانی جیڑہ دیئگ بوتگ، انوگیں حکومت ءَ اولی سال ءَ 5 ہزار زرب کلدار ءِ ڈنی وام ادا کتگ، جاڑیگیں مالی سال ءَ 2700 ارب کلدار ءِ ڈنی وام آناں دیگ بوتگ۔ حکومت ءِ کار کرد ءِ چار ءُ تپاس ءَ زوران ءَ اے بھر آناں ڈلگچار کنگ مہ بیت، اگاں مئے باندات ریسورس بجٹ 2000 ہزار ارب کلار بہ بیت ما وام ءُ سود آنی دیگ ءَ 2700 ارب واپس کنگ ءَ آں گڈا ایشی یے مول ءُ مراد ایش انت کہ حکومت ءَ یک ٹوھیں کامیاتی رستگ۔ آئی ءَ گوشت کہ استیں حکومت ءَ ھرچ ءُ درچ آنی گر ءُ داسر ءِ رد ءَ ترندیں پالشی وتی کتگ، گوستگیں سال ءَ سٹیٹ بینک ءَ یک ٹکہ ءِ وام نہ زرتگ، ھمے رنگ ءَ اچ ادارگ آناں سپلیمنٹری گرانٹ جاڑی نہ کتگ، اولی رند ءَ ما پرائمری بیلنس ءِ سر پلس ءَ شتگ آں بزاں حکومت ءِ ھرچ ءُ درچ آمدنی ءَ چہ کم بوتگ آں۔ آئی ءَ گوشت کہ استیں حکومت ئَ ٹیکس گرگ ءِ نظام ءِ تہ ءَ گہتری، ٹیکس ءِ شاھیگانی ءِ تہ ءَ گیشی ءُ ٹیکس نظام ءَ را آسان جوڑ کنگ ءِ واستہ گامگیج کتگ۔ اے گامگیج آنی سبب ءَ ٹیکس گرگ ءِ کسس ءِ تہ ءَ 17 درسد گیشی بوت کتگ۔ ایشی ءِ تہ ءَ گیش گیشی ھم بوت کنت، پدا ھم حکومت ءَ پہ زانت درآمدی پڑ ءِ دلبڈی کتگ ایشی ءَ چہ درآمدی ٹیکس آنی تہ ءَ کمی ءِ دیم پہ دیمی کنگ کپتگ۔ آئی ءَ گوشت کہ حکومت ءَ را چہ بندات ءَ زرامبار آنی جیڈھ آنی گوما دیم پہ دیمی بوتگ، ایشی ءِ سبب ءَ ھساب آنی وام 20 ارب ڈالر ءِ نزیک ءَ سر بوتگ انت حکومت ءَ اے رد ءَ ٹوھیں گامگیج کتگ، برآمدی پڑ ءِ گیشی ءِ واستہ کوشست کتگ، حکومت ءِ کوشست ءَ چہ ھساب ءُ داد 20 ارب ڈالر وام ءَ چہ کم کنان ئَ سئے ارب ڈالر ءِ تک ءَ آورتگ، اے یک ٹوھیں کامیاتی انت۔ آئی ایم ایف، موڈیز ءُ دومی میاں اوستمانی ادارگ آں پاکستان ءِ کار کرد ءَ را ساڑاتگ۔ آئی ءَ گوشت کہ نوکیں مالی سال ءِ واستہ بنجاھی بجٹ یک انچیں موہے ءَ پیش کنگ بوھگ ءَ انت کہ ملک کورونا وائرس ءِ ھوپ ءَ چہ آماچ بوھگ ءَ ھوار الس ءَ را ریلیف دیگ ءِ سر ءَ دلگوشی دیگ بوتگ۔ کورونا وائرس ءِ ھوپ ءَ چہ پیسر ءَ یک شل ءَ در ملکی سرمایہ کاری ءَ 137 درسد گیشی ریکاٹ کنگ بوتگ۔ اے ھوپ یک انچیں راستی ات کہ ایشی ءَ چہ سرجمیں میاں اوستمانی معشیت آماچ ءَ را آماچ کتگ، پاکستان ھم آماچ بوتگیں ملک آنی لڑ ءَ ھوار انت۔ ۔ اے ھوپ ءَ چہ پاکستان ءِ راجی معشیت ءَ را 3 ہزار ارب کلدار تاوان ءِ اندازگ جنگ بوتگ، کورونا وائرس ءِ سبب ءَ ٹیکس آمدن ءِ تہ ءَ 700 ارب کلدار ءِ کمی بوتگ۔ آئی ءَ گوشت کہ حکومت ءَ احساس ایمرجنسی کیشن گرانٹ ءُ گندم ءِ بھا زوری ءِ واستہ فنڈ گیشینتگ۔ ایشی ءَ چہ چاگرد ءِ گریب ءُ ھمزوریں تبک ءُ دھکان آناں سیت رسیت۔ کشت ءُ کشاری شوبگ ءِ دیمروئی ءِ واستہ ھم ھاسیں پروگرام بندات کنگ بوتگ، ھوپ ءِ سبب ءَ کاروبارری چست ءُ ایر جمود ءِ آماچ بوتگ انت ایشی ءَ گوں گر ءُ چیل بوھگ ءِ واستہ کاروباری تبک ءِ واستہ گامگیج کنگ بوتگ، مشیر ءِ ھزانگ ءَ گ وشت کہ نوکری پیداک کنگ ءِ واستہ 40 ءَ چہ 50 ارب ءِ ڈیوٹیز ھلاس کنگ بوتگ، پٹرولیم چیز آنی نیام آنی تہ ءَ کمی مڈل کلاس ءِ گہتری ءِ واستہ کتگ۔ حکومت ءَ میاں اوستمانی تک ءَ پٹرولیم ءِ چیز آنی نیاد آنی تہ ءَ کمی ءِ سیت ءَ را الس آں تاں سر کتگ ایشی ءَ چہ معیشت ءِ سر ءَ جوانیں رند پد سہرا بوھگ ءَ انت۔ ڈاکٹر عبدالحفیظ شیخ ءَ گوشت کہ آیوکیں مالی سال ءِ ساھت ءَ حکومت 2900 ارب کلدار وام واپس کنگ ءَ انت، وام آنی واپس کنگ معیشت ءِ سر ءَ استیں ٹوھیں جیڈھ انت۔ وام زورگ ءِ شوک نیست، گوستگیں وام آنی واپسی ءِ واستہ وام زورگ ءَ آں۔ بجٹ ءَ السی ریلیف ءِ واستہ گامگیج آنی تران ءَ کنان ءَ آئی ءَ گوشت کہ مشکلیں ساھت آنی ابید حکومت ءَ اچ نوکیں ٹیکس نہ جنگ ءِ پیسلہ کتگ۔ نوکیں مالی سال ءَ 1600 ءَ چہ سامان آنی سر ءَ ڈیوٹی ءَ را ھلاس کنگ بوتگ، کاروباری کچ ءُ کساس ءَ را کم کنگ ءِ واستہ بازیں گامگیج کنگ بوتگ۔ آئی ءَ گوشت کہ نوکیں مالی سال ءَ 200 ٹیرف لائنز آنی سر ءَ ڈیوٹی کم کنگ بوھگ ءَ انت۔ 1600 ٹیرف لائنز آنی سر ریگولیٹری ڈیوٹی کم کنگ بوتگ، امپورٹ ءِ سر ءَ ودہولڈنگ ٹیکس ءَ را کم کنگ بوھگ ءَ انت، سیمنٹ ءِ سر ءَ ایکسائز ڈیوٹی کم کنگ ءِ شور ءُ مشور دیگ بوتگ ایشی ءَ چہ جوڑیشت ءُ گس جوڑ کنوکیں مردم آناں سیت رسیت، جوڑیشت ءِ شوبگ ءِ واستہ ٹیکس آناں نیم کنگ بوتگ۔ آئی ءَ گوشت کہ پوائنٹ آف سیل نظام ءِ رد ءَ ٹیکس ءِ کساس ءَ کم کتگ ایشی ءَ چہ تاجر آناں اے نظام ءِ چیر دستی ءَ آرگ ءِ دلبڈی بیت۔ ڈاکٹر عبدالحفیظ شیخ ءَ گوشت کہ ٹیکس دیوک آناں گیش بار نہ لڈگ ءِ مٹ ءَ ٹیکس ءِ کار رپک ءَ را گیش ودینگ ءِ سر ءَ دلگوشی دیگ بوھگ ءَ انت۔ بجٹ ءَ جندی شوبگ ءِ واستہ آسراتی دیگ بوتگ۔ حکومت ءَ ٹیکس جنگ ءِ مٹ ءَ آسراتی دیگ ءَ را دلگوشی داتگ۔ ڈاکٹر عبدالحفیظ شیخ ءَ گوشت کہ مردم آنی واستہ ٹیکس دیگ ءَ را آسان جوڑ کنگ بوھگ ءَ انت، پاکستان ءَ جی ڈی پی ءِ رد ءَ ٹیکس ءِ کچ ءُ کساس ایوک ءَ 11 درسد انت، الس ءِ آسراتی ءِ واستہ سوداگری ءِ ساھت ءَ شناسی کاٹ ءِ شرط ءَ را یک لکھ کلدار کنگ ءِ شور ءُ سلاھ داتگ۔ یک جستے ءِ پسو ءَ آئی ءَ گوشت کہ وھد ءِ سامان آنی قیمت گیش بیت گڈا ایشی ءَ چہ گیش تکلیف حکومت ءَ را بیت، عمران خان ءَ را پاکستان ءِ الس آں ووٹ داتگ، الس آنی دیمروئی ءُ وشھالی آئی ءِ وژن انت، نوکیں مالی سال ءِ واستہ افراط زرّ ءِ سیم سر 6 ءُ نیم درسد ایر کنگ بوتگ، الس ءِ آسراتی ءِ واستہ ریگولیٹری نظام ءِ تہ ءَ مٹ ءُ بدلی کنگ بوھگ ءَ انت۔ جوڑیشتی صنعت ءِ واستہ آسراتی آنی رد ءَ جست ءِ پد ءَ آئی ءَ گوشت کہ حکومت ءَ جار جتگ ءُ اے آسراتی آں چہ سیت چست کنگ ءِ واستہ جندی شوبگ آنی دلبڈی ھم کنائینتگ۔ آئی ایم ایف ءِ جست ءِ پسو ءَ ڈاکٹر عبدالحفیظ شیخ ءَ گوشت کہ انچو گوشگ بوھگ ءَ انت کہ انچو کہ آئی ایم ایف پاکستان ءِ سر ءَ ظلم کنگ ءِ واستہ جوڑ کنگ بوتگ، آئی ایم ایف یک بینکے ءِ وڑ ءَ کار کنت، 200 ملک آں اے فنڈ جوڑ کتگ ایشانی مول ءُ مراد ایش انت کہ اگاں یک باسکیں ملک ءِ اقتصادی جیڈھ آنی گوما دیم پہ دیم بیت گڈا آئی ایم ایف ایشی ءِ گوما کمک کنت، آئی ایم ایف پاکستان ءَ را اچ حکم دات نہ کنت، آئی ایم ایف ایوک ءَ ایش گوشیت کہ آسراتی آنی رد ءَ ھرچ ءُ درچ ءَ بکن ات ءُ اگاں مشکلیں پیسلہ کنگی بہ بیت گڈا آ بکنت، آئی ایم ایف ءُ پاکستان ءِ جوانیں یکوئی سنگتی است، آئی ایم ایف ءَ کورونا وائرس ءِ ھوپ ءَ گوں گر ءُ چیل بوھگ ءِ واستہ پاکستان ءَ را 1.4 ارب ڈالر ءِ کمک پجاری کتگ، پاکستان ءُ آئی ایم ایف ءِ نیام ءَ شور ءُ مشور آنی رچ جاڑی انت، ھمے رنگ ءَ شو ر ءُ مشور پاکستان ایشیائی دیمروئی بینک ، میاں اوستمانی بینک ءُ ایندگر میاں اوستمانی دیمروئی شریکدار آں گوں کنت۔
