اسلام آباد۔ 12جون (اے پی پی) مزن وزیر ءِ جان ءُ سلامتی پڑ ءِ حاسیں کمک کار ڈاکٹر ظفر مرزا ءَ گشتگ کہ فرنٹ لائن ورکرز آنی رکینگ ءُکمک کنگ مے اولی دلگوشی اِںت، کورونا ءِ حلاپ ءَ جنگ کنوکیں ڈاکٹر ءُ طبی عملہ ءِ ھاترءَ حاسیں پیکج بیت، بنجاہی ءُ صوبائی حکومت حاسیں پیکج ءِ سرکنگ ءِ زمہ وار بنت، گرانیں وہداں زمہ واری پیلو کنوکیں ہیلتھ ورکرز مے بامرد اَنت۔ جمعہ ءِ روچءَ نیوز شونست ءَ آئی ءَ گشتگ کہ جاورھال اے گپ ءِ لوٹ ءَ کناں کہ ایس او پیز ءِ سرءَ ترندی ءَ عمل کنگ بہ بیت۔ فرنٹ لائن ورکرز ءَ را رکینگ ءُ آیانی کمک کنگ مے اولی دلگوشی اِنت۔ آئی ءَ گشتگ کہ بنجاہی ءُ صوبائی حکومت حاسیں پیکج ءِ سرءَ عملدرآمد کنگ ءِ زمہ وار بنت۔ حاسیں پیکیج ءِ 7 حاسیں نکات اَنت۔ آئی ءَ گشتگ کہ حاسیں پیکج ءَ مالی کمک، رکینگ ءُ تربیت ہم ہوار بنت۔ زمہ واری پیلو کنگ ءِ وہد بیران بوہوکیں ہیلتھ ورکرز آناں شہداء پیکج دیئگ بیت۔ چین ءِ کمک ءَ چہ 5ہزار ہیلتھ ورکرزآنی ٹریننگ ءِ بندوبست کنگ بوتگ۔ ہیلتھ ورکرز ہیلپ لائن 1166ءِ سرءَ وتی جیڑہ ءُ جنجالاں ہم درج کنائینت کناں۔ پاکستان ءَ 3 درسد ڈاکٹر ءُ طبی عملہ کورونا وائرس ءِ آماچ بوتگ اَنت۔ ڈاکٹر ظفر مرزا ءَ گشتگ کہ ہیلتھ ورکرزآنی حاندان ءِ مردم ہم علاج ءِ آسراتی ءَ چہ پائدگ چست کُت کناں ۔ نجی نادراہ جاہ آنی کمک ءِ ھاترءَ رعایتی شرح ءَ وام دیئگ بوہگءَ اِنت۔ نجی نادراہ جاہ آناں مشینری ءِ درآمد کنگءِ ٹیکس آنی تہ ءَ رعایت دیئگ بیت۔
