اسلام آباد۔ 12 جون (اے پی پی) صدر مملکت ڈاکٹر عارف علوی پنی آ امریکی جریدہ نیویارک ٹائم اٹی پنی آخاکہ نگار ملک سجاد نا کنڈآن مقبوضہ کشمیر اٹی مرغن انگا لاک ڈاؤن و اوڑآن ودی مروک آ انسانی حالیت آتے تالان کننگ کن جوڑکروک آ عکسی خاکہ غاتا ستاءِ کرساپارینے کہ دا خاکہ غاتا کمک اٹ مقبوضہ کشمیر نا الس آ کروک آ بھارتی بیدادی جہانی برادری نا مون آ پاش مسنے، انشاء اللہ کشمیر آجومریک۔ جمعہ نادے آ صدر مملکت ٹویٹر آ تینا کلہو اٹی کشمیر نا پنی آ خاکہ نگار ملک سجاد نا خاکہ غاتا کمک اٹ مقبوضہ کشمیر نا الس نا مشکل زند ءِ تالان کننگ نا کوشست آتا ستاءِ کرے۔ صدر مملکت پارے کہ مقبوضہ کشمیر اٹی بھارت نا کنڈآن نافذ کروک آ مرغن انگا لاک ڈاؤن برجاءِ۔ صدر مملکت پارے کہ مسہ عشرہ غان زیات آن فوجی کرفیو و ہڑتال تا سوب آن مقبوضہ کشمیر اٹی مخلوق نا زند ژندمسنے۔ صدر مملکت دا عکسی خاکہ ءِ فن انا کمک اٹ سلاہ نا درشانی نا اسہ شاندار ءُ مثال اس گوندا۔ یات سلے کہ پنی آ خاکہ نگار ملک سجاد امریکہ جریدہ نیویارک ٹائم اٹی تینا عکسی خاکہ غاتے ٹی بھارتی حکومت نا کنڈآن مقبوضہ کشمیر اٹی تدوک آ مسہ دہائی آن برجا ظلم ءِ تالان کرینے۔ خاکہ غاتے ٹی داہم پارینے کہ کوروناوائرس لاک ڈاؤن اسہ پین فوجی کرفیو اسے۔ کوروناوائرس نا دین انارداٹ بھارتی لاک ڈاؤن آن مزور آک بیروزگار مسنو۔ لکھ آ بندغ تینا اُراتیا پدی ہنانو۔ پولیس انسداد دہشت گردی کانود نا رداٹ اِرا صحافی تا مقدمہ غاتے درج کرینے و اوفتا رپورٹنگ نا بابت سوج کرے۔ خاکہ غاتے ٹی مستی پاننگانے کہ کوروناوائرس نا دین آن پد ہم مقبوضہ کشمیر اٹی انٹرنیٹ و فون سروس پدریسہ بند کرینے۔ کشمیر اٹی کنا خاہوت کرفیو ٹی زند ءِ تیر کننگ ءِ۔ دنیا نا کورونانا دین انا خلیس آن کشمیر اٹی بھارتی ظلم آ خنک تفوک ءُ۔
