اسلام آباد۔ 12 جون (اے پی پی) وزیر خارجہ مخدوم شاہ محمود قریشی تون تحریک انصاف نا راہشون شوکت محمود بسرا جمعہ نادےآ وزارت خارجہ ٹی اوڑدہی کرے۔ اوڑدہی ٹی گپ وتران اٹی ساڑی آ دینی حالیت آتون اوار و تین پہ تینی است خواہی نا باندات آتیا گپ وتران مس۔ شوکت محمود بسرا کورونادین اٹی دا مشکل ساہت اٹی پیشن نا ملک آتے ٹی رہینگوک پاکستانی تا خذمت نا بابت سفارت خانہ غاتا گچین کارکڑدگی آ وزیر خارجہ ءِ مبارکبادی تس و وطن آ پدی بننگ نا چاری پیشن نا ملک آتے ٹی رہینگوک پاکستانی تا زوت پدی اتنگ کن وزیر خارجہ نا کوشست آتا ستاءِ کرے۔ وزیر خارجہ پارے کہ کچ اٹنگا وسیلہ غاتیان پد ہم کورونادین انا تالانیءِ توننگ و داجہانی چیلنج اتون مون تننگ کن حکومت غٹ گمانی گام گیج آتے چست کننگ ءِ۔ ننے داہیت ءِ است اٹ تخوئی مریک کہ کورونا اسہ جہانی ءُ دین اسے ہرا مچ آ دنیا ءِ تینا پلویڑ اٹی ہلکونے۔ شاہ محمود قریشی پارے کہ پاکستان اٹی کوروناوائرس آن زہمی تا کچ اٹی ودکی مننگ ءِ ۔ اسہ ملک اس ہم ہمووخت اسکان دا بھلا چیلنج نا مقابلہ ءِ کننگ کپک ہراوخت اسکان الس، حکومت نا کنڈآن تروک آ پارت آتیا عملدرآمد ءِ پک کپک، ننے بحیثیت قوم یکجا مرسا دا دین نا تالانی ءِ توروئی ءِ۔
