اسلام آباد۔ 12 جون (اے پی پی) بنجائی وزیر انسانی حق ڈاکٹر شیریں مزاری پارینے کہ ننا چناک قوم انا میرات ءُ اوفتا آخبت ءِ رکھ کننگ ریاست و ننا غٹ انا زمواری ءِ، چائلڈ لیبر نا بابت ننے تینا ذہنیت ءِ بدل کروئی مریک و دا چناتا تعلیم و تربیت و جان جوڑی آ خصوصی چکار کروئی مریک۔ چائلڈ لیبر نا برخلاف جہانی دے انا وخت آ تینا ویڈیو کلہو اٹی ڈاکٹر شیریں مزاری پارے کہ 12 جون چناتا مزوری نا برخلاف جہانی دے انا وڑاٹ اڈتننگک و دابابت ننا آئین پیدوار وڑاٹ پاہک کہ ریاست نا فرض ءِ کہ او 16 سال انا وئی اسکان چناتے تعلیم ایتے و اوفتا جان جوڑی نا خیال ءِ تخے، داڑتون اوار 14 سال اسکان نا وئی نا چناتیان ہچ ءُ خطرناک ءُ کاریم اس ہلنگپ۔ اوپارے کہ پاکستان چناتا حق انا بابت جہانی کنونشن آ ددستخط کرینے و ریاست نا فرض ءِ ہرا شق آتیا دستخط کرینے اوفتیا عملدرآمد ءِ پک کننگے۔ اوپارے کہ ہرا بندغ چناتیان مزوری کرفے دانا مطلب ءِ کہ او کانود ءِ پرغنگ ءِ و انسانیت نا برخلاف کاریم کننگ ءِ دانا برخلاف کارروائی بایدے مرے۔ ڈاکٹر شیریں مزاری پارے کہ چناتیان اُرانا کاریم تے کرفنگ نا بابت ننا داڑے ہچ ءُ پیدوار ءُ کانود اس اف۔ ننے اقبال مسیح و زہرہ شاہ ءِ یات تخوئی مریک، داڑتون ننے دا عزم انا ہم درشانی ءِ کروئی مریک کہ چائلڈ لیبر نا برخلاف انفرادی و اجتماعی کوشست کروئی مریک۔ اوپارے کہ ننا چناک ملک وقوم انا میرات ءُ و اوفتا آخبت ءِ رکھ کننگ ریاست و ننا غٹ انا زمواری ءِ۔ بنجائی وزیر پارے کہ الس وزارت نا ہیلپ لین 1099 آ چائلڈلیبر نا بابت غاوتا حوال ایتر۔
