اسلام آباد۔ 12 جون (اے پی پی) مچ آ ملک اٹی ملخ آتا برخلاف آپریشن نا رداٹ تدوک آ 24 گھنٹہ ٹی 3 لکھ 52 ہزار ایکڑ رقبہ نا سروے مس وخت اس کہ 11 ہزار 730 ایکڑ رقبہ غا ملخ آتے تلف کروک آ دوائی تا اسپرے کننگا۔ جم وڑاٹ 5 لکھ 90 ہزار ایکڑ رقبہ غا اسپرے کننگانے۔ نیشنل ڈیزاسٹرمینجمنٹ اتھارٹی نا ترجمان نا رداٹ داوخت آ ملک انا 52 ضلع غاتے ٹی ملخ آک اریر۔ بلوچستان نا 33، خیبر پختونخوانا 11، پنجاب نا 2 و سندھ انا 6 ضلع ملخ آتیان زہمی مسنو۔ بلوچستان اٹی خضدار، آواران، نوشکی، چاغی، گوادر، اوتھل، کیچ، پنجگور، خاران، واشک و کوئٹہ غان بیدس ایلو ضلع غاک ہم زہمی مسنو۔ کے پی ٹی ڈیرہ اسماعیل خان، ٹانک، قطبی و سویلی وزیرستان ، لکی مروت، کرک، کرم، نوشہرہ، اورکزئی ، پشاوروخیبر نا ضلع غاک زہمی مسنو۔ سندھ اٹی خیبرپور، سانگھڑ، سکھر، شہید بے نظیر آباد، مٹیاری وجامشورو ٹی ملخ آتا جلہو مس۔ پنجاب اٹی مظفرگڑھ و ڈیرہ غازی خان اٹی ملخ آتا حوال ملانے۔ ترجمان نا رداٹ ملخ آتا زہمی علاقہ غاتا سروے و کنٹرول آپریشن برجاءِ۔ 1241 ٹیم لوکسٹ کنٹرول آپریشن اٹی بشخ ہلکر۔ تدوک آ 24 گھنٹہ ٹی 3 لکھ 52 ہزار ایکڑ رقبہ نا سروے مس وخت اس کہ 11 ہزار 730 ایکڑ رقبہ غا ملخ آتے تلف کروک آ دوائی تااسپرے کننگا۔ ترجمان نا رداٹ بلوچستان اٹی 9 ہزار 100 ایکڑ رقبہ غا اسپرے کننگا۔ خیبر پختونخواٹی 1400 ایکڑ رقبہ نا ٹریٹمنٹ مس۔ پنجاب اٹی 300 ایکڑ رقبہ غا اسپرے مس۔ سندھ اٹی تدوک آ دے 1200 ایکڑ رقبہ ٹریٹمنٹ کننگا۔ داوخت اسکان مچ آ ملک اٹی 5 لکھ 90 ہزار ایکڑ رقبہ غا اسپرے کننگانے۔ پشین اٹی 500 و سکھر اٹی 400 ایکڑ رقبہ غا ہوائی جہاز انا کمک اٹ کیمیائی اسپرے کننگا۔
